ऑनलाईन केवायसीच्या नावाखाली डॉक्टरची साडेसात लाखांची फसवणूक..

नागपूर :-एका अज्ञात सायबर चोरट्याने ऑनलाईन केवायसीच्या नावाखाली डॉक्टरची तब्बल साडेसात लाखांची फसवणूक केल्याचा प्रकार नागपूरच्या सीताबर्डी पोलीस ठाण्याच्या हद्दीत उघडकीस आला.

डॉ.राघवेंद्र रवी वय ६७ वर्षे,रा.बाजीप्रभूनगर,नागपूर असे फसवणूक झालेल्या डॉकटरचे नाव असून त्यांनी दिलेल्या तक्रारीवरून सीताबर्डी पोलिसांनी अज्ञात सायबर गुन्हेगारांविरुद्ध फसवणूक आणि माहिती तंत्रज्ञान कायद्यानुसार गुन्हा दाखल केला आहे.विशेष म्हणजे, सायबर भामट्याने डॉक्टरला प्रथम मोबाईलवर केवायसी अपडेट करण्याचा संदेश पाठवला.त्यानंतर, ‘एपीके’ फाईल पाठवून ती फाईल डाउनलोड करण्यास भाग पाडले.फाईल डाऊनलोड करताच संपूर्ण मोबाईलचा ताबा हा सायबर गुन्हेगारांकडे गेला.त्यानंतर,काही क्षणातच डॉक्टरच्या बँक खात्यातून लागोपाठ साडेसात लाख रुपये काढल्याचा मॅसेज आला.मॅसेज येताच आपली फसवणूक झाल्याचे डॉक्टरांच्या लक्षात आले.प्रकरणी पोलीस ठाणे गाठून तक्रार नोंदविली. प्रकरणाचा पुढील तपास सीताबर्डी पोलीस प्रशानाकडून सुरू करण्यात आला आहे.

• नागरिकांना आवाहन👇

अज्ञात व्यक्तींनी मोबाईलवर पाठविलेल्या कोणत्याही फाईल डाऊनलोड करू नका.कुठलीही बँक केवायसीसाठी ग्राहकांना संपर्क करीत नसून स्वतः बँकेत जाऊन केवायसीची प्रक्रिया पार पाडावी.त्याचबरोबर, ऑनलाईन ‘ई-चालन’च्या नावाखाली फसवणूक करण्याचा प्रयत्न केला जात असल्याने अश्या कुठल्याही मॅसेजवर विश्वास ठेवू नये व त्यावर क्लिक करू नये.