उद्रेक न्युज वृत्त
नागपूर :- स्टंटबाजी करताना एका व्यक्तीने झापड मारलेल्या एका तरुणाला या प्रकाराचा बदला घेणे महागात पडले.त्याच्यासह त्याच्या आईविरोधात गुन्हा नोंदविण्यात आला आहे.
लव तुरकर वय १८ वर्षे हुडको कॉलनी,नागपूर असे या स्टंटबाजाचे नाव आहे.सायंकाळी साडेसात वाजताच्या सुमारास राजेश ब्रिजवानी वय ३० वर्षे, हुडको कॉलनी हे त्यांच्या मुलाला दुचाकीवर फिरवत होते.त्यावेळी लव सायकलवर स्टंटबाजी करत होता व तो अचानक ब्रिजवानी यांच्या दुचाकीसमोर आला. यामुळे ब्रिजवानी पडता पडता वाचले.त्यांनी लवला याबाबत जाब विचारला व त्याला झापड मारून निघून गेले.लवने ही गोष्ट त्याच्या घरी जाऊन सांगितली.रात्री साडेआठ वाजताच्या सुमारास तो त्याची आई व आणखी दोन मुलांसह ब्रिजवानी यांच्या घरी पोहोचला.सगळे जण ब्रिजवानी यांना शिवीगाळ करू लागले.लवच्या आईने त्यांना धक्काबुक्की केली व लवने त्यांच्यावर हातातील कड्याने डोक्यावर वार केला.यात ब्रिजवानी जखमी झाले.ते त्याच अवस्थेत जरीपटका पोलिस ठाण्यात पोहोचले.पोलिस त्यांना उपचारासाठी घेऊन गेले.त्यांच्या तक्रारीवरून लव तसेच त्याच्या आईविरोधात गुन्हा दाखल करण्यात आला आहे.
