आंघोळ करण्यासाठी नाल्यातील पाण्यात उडी मारताच बुडाला.. – शाळकरी मुलाचा दुर्दैवी मृत्यू..

ब्रम्हपुरी(चंद्रपूर):-ब्रहपुरी शहराच्या जानी वॉर्ड येथील रहिवासी असलेल्या एका १६ वर्षीय शाळकरी मुलाचा आंघोळीसाठी नाल्यातील पाण्यात उडी मारताच बुडून मृत्यू झाल्याची दुर्दैवी घटना आज,मंगळवार २ जून रोजी सकाळी आठ वाजेच्या सुमारास ब्रम्हपुरी ते चांदगाव मार्गावरील डोंगे घाट नाल्यात उघडकीस आली.नैतिक अशोक शेंडे वय १६ वर्षे,रा.जानी वार्ड,ब्रम्हपुरी,जि.चंद्रपूर असे मृतक मुलाचे नाव असून तो ब्रम्हपुरी शहराच्या ख्रिस्तानंद शाळेतील दहावीचा विद्यार्थी होता.

नैतिक,आणि त्याचे मित्र जय राऊत रा.नान्होरी, ता.ब्रम्हपुरी व सौम्य ढोक रा.सम्राट अशोक चौक,ब्रम्हपुरी हे तिघेही ब्रम्हपुरी येथील क्रीडा संकुलात बास्केटबॉल खेळल्यानंतर चांदगाव मार्गावरील डोंगे घाट नाल्यात आंघोळ करण्यासाठी गेले होते.तिथे गेल्यानंतर सर्वप्रथम नैतिकने पाण्यात उडी मारली.बघता-बघता नैतिक पाण्यात दिसेनासा झाल्याने सोबतचे मित्र घाबरले. दरम्यान,सौम्य ढोक याने नैतिकच्या घरी जाऊन नैतिकचे वडील अशोक शेंडे यांना घडलेल्या प्रसंगाची माहिती दिली.लागलीच अशोक शेंडे यांनी तात्काळ घटनास्थळाकडे धाव घेतली.घटनेची माहिती होताच नागरिकांचा मोठा जमाव गोळा झाला.शोधकार्य राबविण्यात आला.पण तोपर्यंत खूप उशीर झाला होता.