लाखांदूर-देसाईगंज मार्गावर पेटत्या कारचा थरार..

भंडारा :-जिल्ह्याच्या लाखांदूर-देसाईगंज मार्गावरील दुर्गा माता मंदिर पहाडीजवळ भर उन्हात पेटत्या कारचा थरार काल शुक्रवारी घडला.लाखांदूरहून निघालेली कार सोनी-चप्राळ पहाडीजवळ येताच धावत्या कारच्या समोरील टायर अचानक फुटल्याने कार मार्गावरच पलटी झाली.पलटी होताच कारने अचानकपणे पेट घेतला आणि आगीने रौद्ररूप धारण करून संपूर्ण कार भस्मसात झाली.सुदैवाने जीवितहानी टळली,मात्र कारमालकाचे मोठे नुकसान झाले आहे.मंगेश मधुकर राऊत वय ३३ वर्षे,रा.सोनी, ता.लाखांदूर,जि.भंडारा असे कार चालकाचे नाव ते एमएच ३३ व्ही ४१३५ क्रमांकाच्या कारने शुक्रवारी दुपारच्या सुमारास लाखांदूरहून स्वगावी जाण्यासाठी निघाले होते.चप्राळ पहाडीजवळ येताच कारचा अचानक समोरील टायर फुटला. कार भरधाव वेगात असल्याने मंगेश यांचे वाहनावरील नियंत्रण सुटले आणि कार थेट रस्त्यावरच पलटी झाली.कार उलटताच इंजिनमधून धूर निघू लागला आणि अचानक मोठी आग लागली.तत्पूर्वी चालक मंगेश राऊत कारमधून निघताच आगीने रौद्ररूप धारण केले आणि संपूर्ण कार आगीच्या विळख्यात आली.लाखांदूर पोलीस ठाण्यास घटनेची माहिती मिळताच पोलिसांनी तातडीने घटनास्थळ गाठले व तात्काळ लाखांदूर नगरपंचायतच्या अग्निशामक दलाच्या वाहनाला पाचारण करण्यात आले.अग्निशामक पथकाच्या जवानांनी शर्थीचे प्रयत्न करून आग विझवली,तोपर्यंत संपूर्ण कार पूर्णपणे जळून खाक झाली होती.