अखेर किडनी विक्री प्रकरणातील शेतकऱ्यास ५ लाख रुपयांच्या मदतीचा धनादेश वितरीत..

चंद्रपूर :-जिल्ह्याच्या नागभीड तालुक्यातील मिंथूर गावातील रोशन शिवदास कुळे वय ३५ वर्षे या

शेतकऱ्याची व्यथा ऐकून दगडलाही पाझर फुटेल अशी घटना मंगळवार १६ डिसेंबर २०२५ रोजी उघडकीस येताच संपूर्ण राज्यात एकच खळबळ उडाली होती.रोशन कुळेने ब्रम्हपुरीतील काही अवैध सावकारांकडून १ लाख रुपयाचे कर्ज घेतले होते.मात्र,चार ते पाच जणांच्या टोळीने अवाढव्य व्याज आकारत १ लाख रुपयांचा आकडा व्याजासह ७४ लाखांपर्यंत नेला होता.हे कर्ज फेडण्यासाठी रोशनने दुचाकी,ट्रॅक्टर,साडेतीन एकर शेतीही विकली; मात्र व्याजाचा डोंगर वाढतच राहिला. इतकेच नव्हे,तर पैशासाठी अश्लील शिवीगाळ, मारहाणीसह अमानुष क्रूर कृत्य करण्यात आले.२१ मार्च २०२१ पासून हा प्रकार सुरू होता.यानंतर सावकारांकडून ४० ते ६० टक्क्यांपर्यंत व्याजाची रक्कम आकारण्यात आली.७४ लाखाची रक्कम कशी परतफेड करायची?या विवंचनेत असतांना रोशनने किडनी विकण्याचा निर्णय घेतला आणि कंबोडिया देशातील नानपेन शहरात आठ लाखांमध्ये डाव्या बाजूची किडनी विकली.दरम्यान,चंद्रपूर येथील शासकीय रुग्णालयात सोनोग्राफी करण्यात आली.अहवालातून डाव्या बाजूची किडनी काढण्यात आल्याचे वैद्यकीय अहवालातून उघड होताच शासनाने त्यांना न्याय देण्यासाठी विविध स्तरांवर हालचाली सुरू केल्या होत्या.अश्यातच शासनाने प्रकरणाची गंभीर दखल घेत काही दिवसांपूर्वीच मुख्यमंत्री सहाय्यता निधीतून आर्थिक मदत मंजूर केली होती.त्यानुसार,आज, मंगळवार १९ मे रोजी चंद्रपूर जिल्हाधिकारी कार्यालयात जिल्हाधिकारी वसुमना पंत यांच्या हस्ते मुख्यमंत्री सहाय्यता निधीतून मंजूर करण्यात आलेल्या ५ लाख रुपयांच्या मदतीचा धनादेश शेतकरी रोशन कुळे यांना वितरीत करण्यात आला.मुख्यमंत्री सहाय्यता निधीतील ही मदत कुळे कुटुंबीयांसाठी मोठा आधार मानली जात आहे.