भरधाव वेगातील रेतीने भरलेला ट्रॅक्टर उलटला अन् तरणेबांड पोरगा दगावला..!

भंडारा :-ट्रॅक्टरमध्ये रेती भरून रेतीची साठवणूक करण्यासाठी भरधाव वेगात निघालेला रेतीने भरलेला ट्रॅक्टर उलटला आणि चालत्या ट्रॅक्टरवरून खाली कोसळलेल्या चालकाच्या अंगावरून ट्रॅक्टरच्या ट्रॉलीचे चाक गेल्याने २६ वर्षीय तरणेबांड पोराचा जीव गेल्याची घटना आज,रविवार २६ एप्रिल रोजी सकाळच्या सुमारास भंडारा जिल्ह्याच्या लाखांदूर तालुक्यातील ईटान वाळू घाटावर घडली.सचिन सौंदरकर वय २६ वर्षे, रा.ईटान,ता.लाखांदूर, जि.भंडारा असे मृत पावलेल्या तरुणाचे नाव आहे.

लाखांदूर तालुक्याच्या ईटान रेती घाटावर रेती साठवणुकीचे काम सुरू आहे.यासाठी आज रविवारी सकाळच्या सुमारास रेती घाटातून रेती भरलेला ट्रॅक्टर  सचिन सौंदरकर नेत असतांनाच वाटेतच त्याचे ट्रॅक्टरवरील नियंत्रण सुटले.यामुळे सचिन हा चालत्या ट्रॅक्टरवरून खाली कोसळला.खाली कोसळताच धावत्या ट्रॅक्टरच्या ट्रॉलीचे चाक त्याच्या अंगावरून गेले. ट्रॉलीखाली दबल्याने यातच त्याचा मृत्यू झाला.अपघात घडताच उपस्थित कामगारांनी घटनास्थळी धाव घेतली. मात्र,तोपर्यंत खूप उशीर झाला होता.घटनेची माहिती मिळताच पोलिसांनी घटनास्थळी धाव घेतली. घटनास्थळाचा पंचनामा करून मृतदेह उत्तरीय तपासणीसाठी पाठवण्यात आला आहे.घटनेने परिसरात हळहळ व्यक्त केली जात आहे.