भीषण कार अपघातात चार जणांचा जागीच मृत्यू; तर चारजण गंभीर जखमी..

नागपूर येथील कामे आटोपून सर्वजण टीएस ०२ ईएन ५५४४ क्रमांकाच्या अर्टिका कारने त्यांच्या स्वगावी निघाले होते.अशातच परतीच्या प्रवासात असतांनाच  राजुरा तालुक्यातील सोंडो गावाजवळ येताच पहाटे दीड वाजेच्या दरम्यान कार चालकाच्या डोळ्यावर झापड (डुलकी)आल्याने त्याचे कारवरील नियंत्रण सुटले आणि कार पुलावरून थेट नाल्यातील खड्ड्यात कोसळली. अपघात इतका भीषण होता की,कोसळलेल्या कारचा आवाज सोंडो गावापर्यंत ऐकू आल्याचे ग्रामस्थांनी सांगितले.घटना घडताच नागरिकांनी घटनास्थळी धाव घेत तात्काळ घटनेची माहिती राजुरा पोलिसांना दिली.पोलिसांनी घटनास्थळ गाठून बचावकार्य सुरू केले.मात्र, उंचावरून कोसळलेली कार उलटी असल्याने कार मधुन जखमींना बाहेर काढणे अशक्य झाले. त्यामुळे पोलिस उपनिरीक्षक पराग उल्लीवार व पथकाने  महामार्ग निर्माण कंपनीच्या सहकार्याने कटरच्या सहाय्याने कारचा काही भाग कापुन जखमींना बाहेर काढले.तोपर्यंत चार जणांचा घटनास्थळीच मृत्यू झाला,तर चार जण गंभीर जखमी झाले.प्रकरणी राजुरा पोलिसांनी अपघाताची नोंद घेत मृतांचे शव उत्तरीय तपासणीसाठी राजुरा उपजिल्हा रुग्णालयात पाठविले. तर प्राथमिक उपचारानंतर जखमींना चंद्रपूर रुग्णालयात दाखल करण्यात आले.प्रकरणी चालक अब्दुल रहमान याच्यावर कलम २८१,२२५(बी),१०६(१) बीएनएस तसेच मोटार वाहन कायद्याच्या कलम १८४ अंतर्गत गुन्हा दाखल करण्यात आला आहे.पुढील तपास ठाणेदार सुमित परतेकी यांच्या मार्गदर्शनात पोलिस उपनिरीक्षक पराग उल्लीवार करीत आहेत.