देसाईगंज येथे रेल्वे गाडीच्या धडकेत एक इसम ठार..

देसाईगंज(गडचिरोली):-देसाईगंज शहराच्या रेल्वे स्थानकापासून अवघ्या तीनशे मीटर अंतरावरील चुना भट्टी नजिक रेल्वे क्रॉसिंग करतांना एका ३८ वर्षीय इसमाचा रेल्वेच्या धडकेत मृत्यू झाल्याची घटना आज,मंगळवार २५ नोव्हेंबर रोजी दुपारी दीड वाजेच्या सुमारास घडली.अपघातात रोशन सहारे रा.रावनवाडी (बोळधा-कोरेगाव),जि.गडचिरोली असे मृत पावलेल्या इसमाचे नाव असून रोशन हा मूकबधिर(मुका,बहिरा) होता.तसेच तो देसाईगंज नगर परिषदेत सफाई कामगार म्हणून काम करायचा.

घटनेच्या वेळी रोशन हा त्याची सायकल घेऊन चुना भट्टी नजिक असलेली रेल्वे पटरी ओलांडून गांधी वॉर्ड परिसरात जाण्याच्या तयारीत असतांनाच चंद्रपूरहून येणाऱ्या कोरबा एक्स्प्रेसने त्याच्या सायकलला जोरदार धडक दिली.यात त्याचे संतुलन बिघडले आणि डोक्याला जबर मार लागून खाली कोसळताच रोशनचा जागीच मृत्यू झाला.घटना घडताच जवळच असलेल्या नागरिकांनी धाव घेतली व घटनेची माहिती रेल्वे प्रशासन तसेच देसाईगंज पोलिसांना देण्यात आली.घटनास्थळी बघ्यांची मोठी गर्दी असून पुढील प्रक्रिया पार पाडणे सुरू होते.