ब्रम्हपुरीच्या इथेनॉल कंपनी विरोधात गावकरी एकवटले..

ब्रम्हपुरी(चंद्रपूर):-ब्रम्हपुरी शहरापासून हाकेच्या अंतरावर असलेल्या उदापूर ग्रामपंचायतीच्या हद्दीत येणाऱ्या बोरगाव मार्गावरील रामदेव बाबा सॉलवंट कंपनीच्या डिस्टिलेशन प्लांटला बुधवार १९ नोव्हेंबरच्या सायंकाळी टेस्टिंग दरम्यान अचानक भीषण आग लागून मोठा स्फोट झाला होता.आग आणि धुराचे मोठे लोट तसेच उंच उसळणाऱ्या ज्वालांमुळे भीतीचे वातावरण निर्माण झाले होते.आग नियंत्रणात आणण्यासाठी ब्रम्हपुरी,नागभीड,सिंदेवाही व मूल येथील अग्निशमन दल,त्याचबरोबर गडचिरोली जिल्ह्यातील दोन फायर ब्रिगेड तसेच देसाईगंज येथील पथकानेही तातडीने मदतकार्य सुरू केले.तसेच चंद्रपूर महानगरपालिकेच्या दोन फायर टेंडर फोम सोल्यूशनसह घटनास्थळी रवाना करण्यात आल्याने रात्री ८ वाजेपर्यंत आगीवर नियंत्रण मिळविण्यात यश आले होते.अश्यातच कंपनीत झालेल्या स्फोटामुळे परिसरातील विशेष करून उदापूर गावातील नागरिक भयभीत होऊन सैरभैर झाले होते.स्फोटाने गाव परिसर दणाणून गेल्याने संतप्त गावकरी २४ नोव्हेंबरला एकत्र येत शेकडो नागरिकांनी इथेनॉल कंपनी परिसरात जाऊन जोरदार नारेबाजी केली. इथेनॉल प्लान्ट जवळ असलेल्या उदापूर येथील ग्रामस्थांना टेस्टिंगचा त्रास सहन करावा लागत आहे.भविष्यात मोठी दुर्घटना घडण्याची शक्यता नाकारता येणार नसल्याने परिसरातील इथेनॉल कंपनी बंद करण्याची मागणी ग्रामस्थांनी केली आहे.