प्रभागरचनेची अधिसूचना प्रसिद्ध करण्यासाठी एक महिन्याची मुदतवाढ; निवडणुकीचा मुहूर्त लांबणीवर..

उद्रेक न्युज वृत्त :-तब्बल साडे तीन वर्षानंतर स्थानिक स्वराज्य संस्थांच्या निवडणुकांचा बिगुल वाजणार आहे. त्यासाठी महापालिका व नगरपालिकांच्या प्रभागरचनेचा कार्यक्रम जाहीर झाल्याने सर्वच राजकीय पक्षांनी निवडणुकीची तयारी सुरू केली आहे.आजी-माजी नगरसेवकांसह इच्छुकही सक्रिय झाले आहेत. नागरिकांशी संपर्क वाढवला जात आहे.कार्यक्रमानुसार दिवाळीच्या आसपास या निवडणुका होतील,असा अंदाज वर्तविला जात होता.मात्र,अंतिम प्रभागरचनेची अधिसूचना प्रसिद्ध करण्यासाठी एक महिन्याची मुदतवाढ दिली आहे.तसा शासनादेश काढण्यात आला आहे.याचा विचार करता नव्या वर्षातच महापालिका निवडणुकीचा मुहूर्त निघण्याची शक्यता वर्तविली जात आहे.कित्तेक ठिकाणी साडेतीन वर्षांपासून प्रशासक राज आहे.कमीअधिक प्रमाणात हीच परिस्थिती विविध जिल्ह्यातील आहे.ओबीसी आरक्षणाच्या मुद्द्यावरून सर्वोच्च न्यायालयात सुनावणी सुरू असल्याने निवडणूक प्रक्रिया रखडली होती.मात्र,सर्वोच्च न्यायालयाने महापालिका निवडणूक घेण्याचे निर्देश दिल्यानंतर प्रभागरचनेचा कार्यक्रम जाहीर करण्यात आला आहे.चार सदस्यांचा प्रभागाचा निर्णय घेण्यात आला आहे.यासाठी नोटिफिकेशन काढण्यात आले होते.त्यानुसार ११ जूनपासून प्रगणक गटाची मांडणी,गुगल मॅपवर नकाशे तयार करणे,३१ जुलैला प्रभागरचनेचा मुसदा तयार करणे,२२ ऑगस्ट रोजी प्रभागरचना प्रसिद्ध करून त्यावर हरकती व सूचना मागवणे,९ सप्टेंबरला प्रभागरचनेचा प्रस्ताव राज्य निवडणूक आयोगास सादर करणे,त्यानंतर २९ ऑगस्ट ते ४ सप्टेंबर निवडणूक आयोगाने अंतिम केलेल्या प्रभागरचनेच्या अधिसूचनेस प्रसिद्धी असा कार्यक्रम आखून दिला होता.मात्र आता अंतिम प्रभागरचना अधिसूचना प्रसिद्ध करण्यासाठी ३ ऑक्टोंबर ते ६ ऑक्टोंबर अशी जवळपास एक महिन्याची मुदत वाढवून देण्यात आली आहे.दरम्यान भाजपने ‘मोदी सरकार ग्यारह साल बेमिसाल’ या माध्यमातून महापालिका निवडणुकांची तयारी चालवली आहे.४०० सभा व बैठका घेण्याचे नियोजन केले आहे.पक्ष संघटनेत मोठे बदल केले आहेत. उमेदवारांची चाचपणी सुरू केली आहे.असे असले तरी डिसेंबर महिन्यात विधिमंडळाचे अधिवेशन बघता निवडणुकांचा मुहूर्त नव्या वर्षात निघेल,असा तर्क लावला जात आहे.