गडचिरोली शहरात अज्ञात चोरट्यांचा धुमाकूळ; टोळीत दोन तरुण व दोन मुलींचा समावेश..

गडचिरोली :-शहरात अज्ञात चोरट्यांनी धुमाकूळ घालत चामोर्शी मार्गावरील एक फार्मसी व एक बेकरी तर धानोरा मार्गावरील एका रेस्टॉरंटमध्ये धाडसी चोऱ्या करीत चोरी करणाऱ्यांच्या टोळीत दोन तरुण मुले व दोन मुलींचा समावेश असल्याचे सीसीटीव्ही कॅमेऱ्यात आढळून आले आहे.विशेष म्हणजे,चोरट्यांनी चेहरा स्कार्फने पूर्ण झाकला असल्याने त्यांची ओळख पटवणे कठीण झाले आहे.दहा दिवसांपूर्वी गोकुलनगर येथील गणेश कॉलनीमध्ये दोन घरांचे कुलूप तोडून चोरी करण्यात आली होती.तसेच गुजरी परिसरातही चोरी झाल्याने चोरीच्या घटनांमुळे शहरामध्ये भीतीचे वातावरण पसरले आहे.अशातच नुकतेच शहरातील चामोर्शी महामार्गावरील डॉ.कुंभारे यांच्या धन्वंतरी हॉस्पिटलच्या बाजूला असलेल्या स्मार्ट केअर फार्मसी मेडिकल शॉपमध्ये चोरी झाल्याची घटना काल सोमवारी उघडकीस आली.चोरट्यांनी या औषधालयाचे कुलूप तोडून आत प्रवेश केला.प्रवेश करून ड्राव्हरमधील नगदी रक्कम घेऊन पसार झाल्याची घटना पहाटे ३ वाजताच्या दरम्यान घडली.विशेष म्हणजे,याच दरम्यान धानोरा मार्गावरील साई वृंदावन रेस्टॉरंटमध्येही चोरट्यांनी कुलून तोडून प्रवेश केला.येथेही काऊंटरमधील रक्कम घेऊन ते पासर झाले.त्यातही आदल्या दिवशीच मध्यरात्री चामोर्शी मार्गावरीलच वडेट्टीवार कॉम्प्लेक्समधील कृष्णा बेकरी येथेही पहाटेच्या सुमारास कुलूप तोडून चोरट्यांनी चोरी केली होती. चोरीच्या घटनांमुळे शहरवासिय धास्तावले असून पोलीस प्रशासनाने अज्ञात चोरट्यांचा तात्काळ बंदोबस्त करावा,अशी मागणी नागरिकांकडून केली जात आहे.