ऐन सणाच्या तोंडावर मशिदीत स्फोट; दोघांना अटक..

बीड :-जिल्ह्याला काही कालावधीपासून ग्रहण लागल्याचे दिसून येत आहे.विविध गुन्हेगारी प्रकरणात बीड जिल्हा आघाडीवर येत आहे.सरपंच संतोष देशमुख हत्या प्रकरण गाजत असतानांच बीड जिल्ह्याच्या गेवराई तालुक्यातील एका मशिदीत स्फोट झाल्याची धक्कादायक माहिती समोर आली आहे.उद्या सोमवार ३१ मार्चला रमजान ईद पूर्वीच बीडच्या गेवराई तालुक्यातील अर्धमसला गावात मध्यरात्री तीन वाजताच्या सुमारास गावातील मशिदीमध्ये दोन युवकांनी जिलेटीनच्या माध्यमातून स्फोट घडवून आणल्याने जिल्हाभरात खळबळ उडाली आहे. घटनेची माहिती पोलिसांना मिळताच स्वतः पोलीस अधीक्षक नवनीत कावत यांनी आज रविवारी पहाटेच गाव गाठून तपास सुरू केला होता.स्फोटात मशिदीतील फरशी फुटली तसेच भिंतीला भेगा पडल्या.पण सुदैवाने कोणीतीही जीवितहानी झालेली नाही.प्रकरणी दोघांना अटक करण्यात आली आहे. गेवराई तालुक्यातील अर्धमसला गावात मशिदीत स्फोट घडवून आणण्यापूर्वी आरोपी विजय गव्हाणे याने चक्क इंस्टाग्रामवर रील बनवले असल्याचे समोर आले आहे.पोलिसांनी या प्रकरणात विजय गव्हाणेसह श्रीराम सागडे याला देखील ताब्यात घेतलं आहे. ‘शिस्तीत रहा बेट्या मी अंगार भंगार नाय रे’, असे गाणे लावत आरोपीने रील बनवला.व्हिडीओत आरोपीच्या हातात जिलेटीनच्या कांड्या आणि तोंडात सिगारेट आहे.पोलिसांनी प्रकरणाची गंभीर दखल घेत घटनेप्रकरणी दोन आरोपींना तात्काळ अटक केली आहे.गावातील स्थानिक वादातून हा प्रकार घडल्याचा प्राथमिक अंदाज पोलिसांकडून वर्तविण्यात येत आहे.

(जिलेटीनच्या कांड्यांचा वापर स्फोटक म्हणून खाणकामच्या ठिकाणी केला जातो.विशेषता: विहिर खोदने,रस्ते किंवा इतर कामांदरम्यान अडथळा ठरणारे मोठमोठे दगड किंवा खडक फोडण्यासाठी जिलेटीनचा वापर केला जातो.)