पोलीस विभागात चालले तरी काय? चक्क महिला पोलिस उपनिरीक्षक अडकली एसीबीच्या जाळ्यात…

नागपूर :-एरवी पोलीस खात्याला लाच स्वीकारण्याचे ग्रहण लागले की काय? असा प्रश्न पडला आहे. ज्यांच्या खांद्यावर जनतेची सेवा करण्याची मोठी जबाबदारी आहे; असे सदरक्षणाय पैश्याच्या नादात कमावलेली इज्जत बेइज्जत करू लागल्याचा प्रकार हल्ली उघडकीस येऊ लागला आहे.नुकतेच एका जमीन प्रकरणात गुन्हा दाखल न करण्याच्या बदल्यात कोराडी पोलिस ठाण्यातील सहाय्यक पोलिस निरीक्षकास दोन लाखांची लाच घेतांना एसीबीच्या पथकाने बुधवारी दुपारच्या सुमारास रंगेहाथ अटक केल्याची घटना ताजी असतांनाच परत पुन्हा एकदा भ्रष्टाचारी तत्त्वांचा मुद्दा एमआयडीसी बुटीबोरी पोलिस ठाण्याच्या आवारात समोर आला आहे.चक्क महिला पोलिस उपनिरीक्षकाने चोरीच्या गुन्ह्यात आरोपी न करण्यासाठी एक लाख रुपयांची लाच मागत ३० हजार रुपये घेतल्या प्रकरणी एसीबीच्या जाळ्यात अडकल्याची घटना काल, गुरुवारी ६ फेब्रुवारीला सायंकाळच्या सुमारास घडली.प्रकरणी गुन्हा दाखल करण्याची प्रक्रिया रात्री उशिरापर्यंत सुरू होती.ज्योत्स्ना प्रभू गिरी वय ३४ वर्षे असे अटक करण्यात आलेल्या महिला पोलीस उपनिरीक्षकाचे नाव आहे.

ज्योत्स्ना गिरी यांनी तक्रारकर्त्यास एका चोरीच्या गुन्ह्यातून निर्दोष सुटका करण्याकरीता लाचेची मागणी केली.त्यानुसार २६ वर्षीय तरुणास ठाण्यात बोलावून एक लाख रुपयाची मागणी करून त्याच्याकडील हिसकावून घेतलेला मोबाईल परत देण्याचे मान्य केले. तक्रारकर्त्यास लाच देण्याची मुळीच इच्छा नसल्याने त्याने याबाबत नागपुरातील एसीबीच्या कार्यालयात तक्रार दाखल केली.गिरी यांनी एक लाख रुपयांच्या बदल्यात ३० हजार रुपये घेण्याची तयारी दर्शविली. त्यानुसार एसीबीने काल गुरुवारी सापळा रचून ३० हजार रुपये घेतांना ज्योत्स्ना गिरी यांना रंगेहाथ अटक केली. गिरी ह्या मागील काही दिवसांपासून एमआयडीसी बुटीबोरी ता.हिंगणा पोलिस ठाण्यात गुन्हे प्रकटीकरण प्रमुखपदी कार्यरत होत्या.सदरची कारवाई एसीबीचे पोलिस अधीक्षक डॉ.दिगंबर प्रधान,अप्पर पोलिस अधीक्षक संजय पुरंदरे यांच्या मार्गदर्शनात उपअधीक्षक राकेश साखरकर,पोलिस निरीक्षक प्रशांत केदार, हवालदार पंकज घोडके,महेश सेलोकर,कांचन गुलबासे, सचिन किन्हेकर,प्रिया नेवारे यांच्या पथकाने केली.