ई-केवायसी न केल्यास राशन होणार बंद..! – गडचिरोली जिल्ह्यात ३ लाखाच्या वर सदस्यांची ई-केवायसी प्रलंबित..

गडचिरोली :-शासनाच्या आदेशानुसार सर्व अंत्योदय व प्राधान्य योजनेच्या सर्व शिधापत्रीकाधारकांनी आपल्या शिधापत्रीकेमधील सर्व सदस्यांची ई-केवायसी करणे आवश्यक आहे.यासाठी विशेष मोहीम सुरु असुन,येत्या २८ फेब्रुवारी २०२५ पर्यंत ई केवायसी न केल्यास,धान्य मिळणार नाही.यासाठी सर्व शिधापत्रीकाधारकांनी रास्तभाव दुकानात जावून ई-केवायसी करावी,असे आवाहन गडचिरोली जिल्हा पुरवठा अधिकारी प्रकाश पाटील यांनी केले आहे. तसेच नो नेटवर्क झोनमधील गावाकरीता,नेटवर्क असलेल्या ठिकाणी विशेष कॅम्प आयोजीत करुन ई-केवायसी करुन घेण्याबाबत तहसिलदार यांना आदेश देण्यात आले आहेत.

ई-केवायसी प्रक्रिया करण्यासाठी रास्तभाव दुकाने पुर्णवेळ सुरु ठेवावी.जिल्हा पुरवठा कार्यालयाकडून प्रत्येक महिण्यातील १ तारखेपर्यंत जिल्ह्यातील सर्व रास्तभाव धान्य दुकानात,लाभार्थ्यांकरीता धान्य उपलब्ध करुन देण्यात येते.प्रत्येक महिण्याच्या ७ तारखेला अन्नदिवस साजरा केला जातो,त्या दिवसापर्यंत जास्तीत जास्त लाभार्थ्यांनी धान्याची उचल करावी.तसेच ७ ते १५ तारखेपर्यंत अन्न सप्ताह साजरा केल्या जातो.त्यामुळे १५ तारखेपर्यंत रास्तभाव धान्य दुकानामधुन १०० टक्के लाभार्थ्यांनी धान्याची उचल करावी,असेही जिल्हा पुरवठा अधिकारी यांनी आवाहन केले आहे.

गडचिरोली जिल्ह्यातील अंत्योदय व प्राधान्य योजनेच्या गटातील शिधापत्रीकाधारकांना मोफत रेशनधान्य देण्यात येते,यासाठी सर्व लाभार्थ्यांची आधारशी निगडीत ई केवायसी रास्तभाव धान्य दुकानात होणे बंधनकारक आहे.’वन नेशन वन रेशन’ उपक्रमात देशभरात ज्या ठिकाणी लाभार्थी धान्य घेत आहेत.त्याच दुकानात त्यांची ई-केवायसी होणे अनिवार्य आहे.गडचिरोली जिल्ह्यात अंत्योदय व प्राधान्य योजनेच्या एकुण २२३९०५ शिधापत्रीका असुन ८४१८५१ सदस्य आहेत.त्यापैकी ५२१७१५ सदस्यांची इ-केवायसी पूर्ण झाली आहे.उर्वरीत ३२०१३६ शिधापत्रीकेतील सदस्यांची ई-केवायसी प्रलंबित आहे.त्यामुळे प्रलंबित असलेल्या सदस्यांनी तात्काळ ई-केवायसी करून घ्यावी; अन्यथा राशन मिळणे बंद होणार आहे.

नोंदणीकृत स्थलांतरीत व असंघठीत कामगारांना ई-श्रम पोर्टलवरील नोंदणीनुसार रेशन कार्ड वितरीत करण्यात येणार आहे.ज्या कामगारांकडे अजुनही रेशनकार्ड नाही,त्यांनी तातडीने तहसील कार्यालयामध्ये अर्ज करावा,त्यांना तातडीने रेशनकार्ड वितरीत करण्यात येईल,असे गडचिरोली जिल्हा पुरवठा अधिकारी यांनी कळविले आहे.