मुरुमाचे अवैध उत्खनन भोवले; तब्बल १ कोटी ६१ लाख रुपयांचा दंड..

चंद्रपूर :-चंद्रपूर जिल्ह्यासह गडचिरोली जिल्ह्यात सध्याच्या घडीला नवीन रेल्वे रुळाचे काम सुरू आहे.सर्वप्रथम रेल्वे रुळाच्या रस्ता बांधकामाकरीता मोठ्या प्रमाणावर मुरुमाची आवश्यकता असते.अशातच चंद्रपूर जिल्ह्याच्या वरोरा तालुक्यातील डोंगरगाव परिसरात रेल्वे विभागाने महसूल विभागाची परवानगी न घेता मुरमाचे खोदकाम केले.यातील मुरमाचा रेल्वे लाइनच्या कामात वापर केला असल्याचे महसूल विभागाने केलेल्या चौकशीत हा प्रकार उघडकीस आल्यानंतर १ कोटी ५१ लाखांचा दंड आकारण्यात आला.मात्र, कंत्राटदाराने उपविभागीय अधिकाऱ्यांकडे अपील केली.या अपीलमध्येही दोषी आढळल्याने कंत्राटदावर आणखी १० लाखाने दंड वाढविला आहे.आता कंत्राटदाराला १ कोटी ६१ लाख रुपयांचा दंड भरावा लागणार आहे.

डोंगरगाव रेल्वे परिसरात तिसऱ्या रेल्वे लाइनकरिता काम सुरू आहे.या कामासाठी डहाळा रिटमधील सर्वे नंबर-२४ मधील जागा रेल्वेची असल्याचे कंत्राटदाराने भासवून अवैधरीत्या मुरमाचे खोदकाम केले.येथील मुरूम रेल्वेच्या कामात वापरला.यासंदर्भात डहाळा रिट परिसरातील ग्रामस्थ तसेच छोटु शेख यांनी महसूल प्रशासनाकडे तक्रार केली.या तक्रारीनंतर तहसीलदारांसह अन्य कर्मचाऱ्यांनी चौकशी केली. यामध्ये परवानगी न घेता उत्खनन केल्याचे निष्पन्न झाले.तहसील प्रशासनाने प्रथम एक कोटी ५१ लाख रुपयांचा दंड आकारला होता.यामध्ये उपविभागीय अधिकाऱ्यांकडे अपील केल्यानंतर दंडाची रक्कम आणखी वाढली.यामुळे आता कंत्राटदाराला वाढीव दंड भरावा लागणार आहे. याबाबत चर्चाना उत आला आहे.