शासकीय जागेवर अतिक्रमण करणे सरपंचास भोवले; सरपंच पदमुक्त..

भंडारा :-शासकीय जागेवर अतिक्रमण करणे सरपंचास भोवले आहे.शासकीय जागेवर अतिक्रमण करीत घराचे बांधकाम केल्याप्रकरणी भंडारा जिल्ह्याच्या तुमसर तालुक्यातील बपेरा येथील सरपंच यादवराव लालाजी बोरकर यांना जिल्हाधिकाऱ्यांचा ५ मार्च २०२४ रोजी दिलेला आदेश कायम ठेवत नागपूर विभागाच्या नागपूर येथील अपर आयुक्तांनी पदमुक्त केले आहे.

अधिक माहिती अशी की,बपेरा गावात असणाऱ्या गट क्रमांक ५५६ मधील जागा आठवडी बाजार,झुडपी जंगलाकरिता नोंद करण्यात आली आहे.या गटातील ६०० चौरस फूट जागेत सरपंच यादवराव लालाजी बोरकर यांनी घराचे पक्के बांधकाम केले आहे. शासकीय जागेवर अतिक्रमण केल्यामुळे सरपंच यादवराव बोरकर यांना सरपंच पदावरून पदमुक्त करण्यासाठी गावातील सामाजिक कार्यकर्ते व्यंकट राऊत यांनी जिल्हाधिकारी यांच्या दालनात प्रकरण दाखल केले होते.या प्रकरणात सुनावणी घेत असतांना संबंधित प्रकरणातील सर्व पुरावे तपासले गेले.चौकशीअंती जिल्हाधिकाऱ्यांनी ग्रामपंचायत अधिनियम १९५९ चा कलम १४ (३) नुसार सरपंच यादवराव बोरकर यांना पदमुक्त करण्यात येत असल्याची कारवाई केली.यासंदर्भात ५ मार्च २०२४ ला पदमुक्त करण्यात येत असल्याचा निर्णय दिला.या निर्णयाला आव्हान देणारी याचिका सरपंच यादवराव बोरकर यांनी अपर आयुक्त नागपूर यांच्या दालनात सादर केले.अप्पर आयुक्तांनी सुनावणी घेत जिल्हाधिकारी यांनी दिलेला निर्णय कायम ठेवला असून,अपिलार्थी सरपंच यादवराव बोरकर यांची अपिल फेटाळण्यात आली. सरपंच पदावरून पदमुक्त करण्यात येत असल्याचा निर्णय अपर आयुक्त डॉ. माधवी खोडे चवरे यांनी दिलेला आहे.जिल्हाधिकारी आणि अपर आयुक्त यांनी दिलेल्या निर्णयाने सरपंच पदमुक्त झाले आहेत.