आमदार रामदास मसराम यांच्या प्रयत्नाने बांधकाम लाभार्थ्यांच्या आशा पल्लवित.. – बांधकाम लाभार्थ्यांना वितरण होई पर्यंत मिळणार वाळू..

कुरखेडा(गडचिरोली):-गेली तीन ते चार वर्षांपासून रेती घाटांची लिलाव प्रक्रिया रखडल्याने सगळीकडेच मोठ्या अवैध वाळू उपसा केला जातो आहे.अशातच घरकुल बांधकाम लाभार्थी तसेच इतर बांधकामे करण्यासाठी वाळूची नितांत गरज असतांना शासनाच्या जाचक अटींमुळे सर्वसामान्य नागरिकांना पाच ब्रास मोफत वाळूसाठी कमालीचा त्रास सहन करावा लागत होता.त्यातच आता गडचिरोली जिल्ह्याच्या कुरखेडा,देसाईगंज,कोरची,आरमोरी सह इतरही तालुक्यात बांधकाम लाभार्थ्यांना तालुका महसूल विभागाच्या वतीने पाच ब्रास मोफत वाळूचे वाटप करण्यात येत आहे.अशातच कुरखेडा तालुक्यातील बांधकाम लाभार्थ्यांना महसूल विभागाने वाळू वितरणासाठी केवळ तीन दिवसांचा कालावधी ठरवून दिला होता.त्यामुळे काही लाभार्थ्यांना वाहतुकीचे साधन वा इतर कारणांमुळे वेळेत वाळूची उचल करणे अवघड झाले होते.सदरची बाब आरमोरी विधानसभा क्षेत्राचे आमदार रामदास मसराम यांच्या कानी पडताच त्यांनी कुरखेडा,कोरची व इतर तालुक्यातील तहसील कार्यालयांशी संपर्क साधून बांधकाम लाभार्थ्यांना पाच ब्रास मोफत वाळूची उचल करण्याकरीता ठराविक कालावधी ठरवून न देता सर्व लाभार्थींना वाळूचे वितरण होई पर्यंत वाळू देण्याची मागणी केली.त्यानुसार तालुका महसूल प्रशासनाने सकारात्मक प्रतिसाद देत सर्व लाभार्थींना वाळूचे वितरण होई पर्यंत पाच ब्रास मोफत वाळू देण्यात येणार असल्याचे स्पष्ट केले आहे. त्यामुळे आमदार रामदास मसराम यांच्या प्रयत्नाने बांधकाम लाभार्थ्यांच्या आशा पल्लवित झाल्या आहेत.