१५ हजाराच्या लाच प्रकरणी चक्क सरपंचासह ग्रामसेवक लाच लुचपत प्रतिबंधक विभागाच्या जाळ्यात..

भंडारा :-शहरापासून आठ किलोमीटर अंतरावर असलेल्या पलाडी ग्रामपंचायतीच्या महिला सरपंचासह ग्रामसेवक लाच लुचपत प्रतिबंधक विभागाच्या जाळ्यात अडकल्याची खळबळजनक घटना काल,शुक्रवारी दुपारच्या सुमारास उघडकीस आली. विशेष म्हणजे,सरपंच आणि ग्रामसेवक यांनी मिळून १५ हजार रुपयांची लाच ना हरकत प्रमाणपत्र देण्यासाठी मागितली होती.सरपंच लता संदीप गोस्वामी वय ३६ वर्षे व ग्रामसेवक मिलिंद रुपदास जनबंधू वय ५४ वर्षे असे लाच लुचपत प्रतिबंधक विभागाच्या जाळ्यात अडकलेल्यांची नावे आहेत.

अधिक माहिती अशी की,तक्रारदारास पलाडी येथील जागेवर घर बांधकाम करावयाचे होते.त्यानुसार तक्रारदाराने ग्रामपंचायत पलाडी येथे २०२४ च्या

नोव्हेंबर महिन्यात अर्ज केला होता.त्यानंतर २१ डिसेंबर रोजी तक्रारदाराने सरपंच व ग्रामसेवकाला भेटून ना हरकत प्रमाणपत्र देण्यासाठी चर्चा केली.चर्चा करीत असतांना हळूचकन दोघांनीही प्रमाणपत्रासाठी १५ हजार रुपये लागतील,असे वक्तव्य केले.त्यामुळे तक्रारदाराने लाच लुचपत प्रतिबंधक विभाग(अँटी करप्शन ब्युरो) भंडारा येथे तक्रार केली.यावरून २० जानेवारी रोजी पंचासमक्ष पडताळणी केली असता,लाचेची मागणी पंचासमक्ष केल्याचे निष्पन्न झाले.त्यानुसार एसीबीच्या पथकाने काल,शुक्रवारी २४ जानेवारीला दुपारच्या सुमारास सापळा रचला.दरम्यान,सरपंच गोस्वामी यांना रक्कम स्वीकारतांना रंगेहात पकडण्यात आले.त्यानुसार सरपंचासह ग्रामसेवकास अटक करण्यात आली.