सोने-चांदीची दरवाढ जोमात तर सर्वसामान्य कोमात..!

नागपूर :-नागपूरच्या सराफा बाजारात मौल्यवान धातूंनी उंच भरारी घेत सोने चांदीची दरवाढ जोमात तर सर्वसामान्य कोमात अशी अवस्था करून सोडली आहे. सोन्याच्या दराने ३ टक्के जीएसटीसह १ लाख ८६ हजार ८०० रुपयांचा टप्पा ओलांडला असून,चांदीने प्रथमच ४ लाख ५ हजार २०० रुपयांचा ऐतिहासिक टप्पा पार केला आहे.ऐन लग्नसराईच्या दिवसांत किंमती आवाक्याबाहेर गेल्याने खरेदीवर मोठा परिणाम झाला आहे.काल गुरुवारी २९ जानेवारीला ३ टक्के जीएसटीसह दहा ग्रॅम २४ कॅरेट सोन्याचे दर १,८६,८०० रुपये आणि चांदी तब्बल ४,०५,२०० रुपयांवर पोहोचली.बुधवार,२८ जानेवारीच्या तुलनेत गुरुवारी सोन्यात १७ हजार ५०० आणि चांदीत २२ हजार रुपयांची वाढ झाली.नवीन वर्षात झालेली ऐतिहासिक दरवाढ सराफा क्षेत्रात थक्क करणारी आहे.चालू वर्षातील केवळ २९ दिवसांत सोने ५३ हजार ५०० आणि चांदी १ लाख ६९ हजार ५०० रुपयांनी महागली.सोन्या-चांदीच्या दरवाढीच्या गतीने सामान्यांचे बजेट कोलमडले असून खरेदीदारांची चिंता वाढली आहे.