साहेब..! नागपूर,गोंदियासह गडचिरोली जिल्ह्यातील शिक्षक घोटाळ्याची चौकशी करा- कैलास बगमारे – बोगस अल्पसंख्याक व बोगस शालार्थ आयडी प्रकरणी नागपूर पोलीस ठाण्यात तक्रार दाखल..

गडचिरोली :-शिक्षण उपसंचालक कार्यालयातील बोगस शिक्षक भरतीचा प्रकार चव्हाट्यावर आला होता.या प्रकरणात शिक्षण विभागातील उपसंचालक उल्हास नरड यांच्यासह काही अधिकारी,कर्मचाऱ्यांना अटक करण्यात आली होती.यात गोंदिया जिल्ह्यातील एक शिक्षक व एका संस्थेचा संचालक अशा दोघांचा समावेश आहे. बोगस शिक्षक भरतीत गोंदिया जिल्ह्यात धागेदोरे व अटक करण्यात आलेल्या म्हैसकर याने काय-काय केले?त्याच्या तपासणीसाठी हे पथक गोंदियात दाखल झाले होते.नागपूर येथील पोलिस उपायुक्त-२ यांचे पथक शुक्रवारी ९ मे रोजी दुपारी गोंदियाच्या शिक्षण विभागात दाखल झाले. दरम्यान,दुपारी ४ वाजेपासून त्यांनी चौकशी केली. बनावट मान्यतापत्र व आयडीवरून शिक्षक भरती करून शासनाची फसवणूक करण्यात आली.गोंदिया जिल्ह्यातील एका शाळेचा शिक्षक म्हैसकर व एका संचालकाला अटक करण्यात आली. म्हैसकर हा बनावट मान्यतापत्र तयार करून देत होता. चौकशीदरम्यान भरतीसाठी वापरण्यात आलेले बनावट मान्यतापत्र तपासण्यासाठी पोलिस उपायुक्तांचे पथक गोंदिया येथे दाखल झाले होते. शासनाची शिक्षक भरती बंद असतांना गोंदियात बोगस शिक्षक भरती करण्यात आली.या बोगस भरती प्रकरणाची चौकशी करण्यासाठी पोलिस उपायुक्तांचे पथक माध्यमिक शिक्षण विभागात दाखल झाले होते.माध्यमिक शिक्षणाधिकारी डॉ.महेंद्र गजभिये,अधीक्षक नरेंद्र भगत यांच्याकडून संबंधित पत्रासंदर्भात माहिती जाणून घेतली.अशातच आता गडचिरोली जिल्ह्यातील विश्वशांती विधालय कुनघाडा (रै) व विश्वशांती विद्यालय भेंडाळा ता.चामोर्शी जि.गडचिरोली येथील बोगस अल्पसंख्याक पत्राच्या आधारे संस्थापक व इतर कर्मचाऱ्यांनी संगनमत करून बोगस शालार्थ आयडी बनविली या तपासात अडथळा येऊ नये,यासाठी संबंधितांना ताब्यात घेतल्यास मोठा घोटाळा उघडकीस आल्याशिवाय राहणार नाही,करीता नागपूर,गोंदियासह गडचिरोली जिल्ह्यातील शिक्षक घोटाळ्याची चौकशी करून संबंधितांवर गुन्हा दाखल करण्याच्या मागणीची तक्रार भाजपाचे गडचिरोली पंचायत राज ग्रामविकास जिल्हा सहसंयोजक कैलास जे.बगमारे यांनी नागपूरचे फुटाळा रोडवरील सदर पोलीस स्टेशनला पत्रानिशी दाखल केली आहे.त्यामुळे येत्या पुढील काळात शिक्षक भरती घोटाळ्यात गडचिरोली जिल्ह्याचे नंबर लागण्याची शक्यता वर्तविण्यात येत आहे.