कुरखेडाच्या देऊळगाव खरेदी केंद्रातील धान अपहार प्रकरणी पाच आरोपी अटकेत.. -आता अटकेतील आरोपींची संख्या झाली सात..

गडचिरोली :-जिल्ह्यातील कुरखेडा तालुका अंतर्गत येणाऱ्या देऊळगाव खरेदी केंद्रात उघडकीस आलेल्या धान अपहार प्रकरणात मोठी कारवाई करण्यात आली आहे.आदिवासी विविध कार्यकारी सहकारी संस्था देऊळगाव येथे पणन हंगाम २०२३-२४ व हंगाम २०२४-२५ मध्ये आधारभूत खरेदी योजनेअंतर्गत धान खरेदी करण्यात आला होता.परंतु साठा पुस्तकानुसार व प्रत्यक्ष शिल्लक धान यात प्रथम दर्शनी तफावत आढळल्यामुळे शिल्लक धानाची मोजणी व्यवस्थापकीय संचालक नाशिक यांच्या आदेशानुसार करण्यात आली.त्या मोजणीत दोन्ही हंगामात १०,०८४.०८ क्विंटल धान कमी आढळून आल्याने गडचिरोलीचे जिल्हाधिकारी अविश्यांत पंडा यांनी या प्रकरणाची गंभीर दखल घेत आरोपींवर कारवाई करण्याचे निर्देश दिले होते.त्यामुळे आदिवासी विविध कार्यकारी सहकारी संस्था  देऊळगावचे सचिव,संचालक तसेच संबंधित अधिकारी व कर्मचारी अशा एकूण १७ जणांविरुद्ध कुरखेडा पोलीस ठाण्यात शुक्रवार १८ एप्रिल २०२५ रोजी भारतीय न्याय संहितेच्या कलम ३१६ (५),३१८ (४),३(५) अन्वये रात्री उशिरा पर्यंत गुन्हा दाखल करण्यात आला होता.त्यानुसार देऊळगाव खरेदी केंद्राचे प्रभारी विपणन निरीक्षक चंद्रकांत कासारकर व हितेश पेंदाम यांना याआधीच अटक करण्यात आली होती.अशातच आता आणखी ५ संचालकांना कुरखेडा पोलिसांनी अटक केली आहे.आणखी ५ जणांना अटक केल्याने आता अटकेतील आरोपींची संख्या सात झाली आहे.पोलिसांकडून अटक करण्यात आलेल्यांमध्ये संस्थेचे अध्यक्ष पतिराम कोकोडे,उपाध्यक्ष पंढरी दादगाये आणि संचालक मंडळाचे सदस्य भाऊराव कवाडकर, नुसाराम कोकोडे आणि भीमराव शेंडे यांचा समावेश आहे.घोटाळ्यातील मुख्य आरोपी कुरखेडा उप प्रादेशिक व्यवस्थापक मुरलीधर बावणे आणि संस्थेचा व्यवस्थापक महेंद्र मेश्राम यांच्यासह १० आरोपी अद्यापही फरार आहेत. फरार आरोपींचा शोध पोलिसांकडून घेतला जात असून प्रकरणाचा पुढील तपास कुरखेडा पोलीस ठाण्याचे पोलिस निरीक्षक महेंद्र वाघ करीत आहेत.