उद्रेक न्युज वृत्त
भंडारा :- शेतात टाकलेल्या विजेच्या तारांचा विद्युत शॉक लागून एका तरुणाचा मृत्यू झाला.घटनेची माहिती त्याच्या सहकारी तरुणाने काकांना दिली. त्यानंतर काकाने पुरावा नष्ट करण्याच्या उद्देशाने त्यांनी शेताच्या आवारात लावलेल्या वीज तारा काढत तरुणाचा मृतदेह शेततळ्यात फेकून दिला.ही खळबळजनक घटना साकोली पोलिस ठाण्याच्या हद्दीतील खांबा येथे घडली.शैलेश रहांगडाले वय २९ वर्षे असे मृताचे नाव आहे.
माहितीनुसार,आरोपींनी उसाच्या शेताच्या आवारात विजेच्या जिवंत तारा टाकल्या होत्या.१२ जुलै रोजी सायंकाळी पियुष हा शैलेशसोबत शेतात गेला होता. तेथे करंट असल्याचे माहीत असूनही पियुषने स्वतः काही अंतरावर उभे राहून शैलेशला बांबू आणण्यासाठी शेतात पाठवले.पियुषच्या डोळ्यासमोर शैलेशचा विजेचा धक्का बसून मृत्यू झाला.पियुषने हा प्रकार काका नारिक यांना सांगितला.त्यानंतर नारिकने शेतात जाऊन विद्युत तारा काढून शैलेशचा मृतदेह शेत तळ्यात फेकून दिला.दुसरीकडे शैलेश घरी न आल्याने कुटुंबीयांनी या दोघांकडे चौकशी केली. समाधानकारक उत्तर न मिळाल्याने शैलेशचे वडील संजू रहांगडाले वय ५१ वर्षे यांनी साकोली पोलिस ठाण्यात तक्रार दाखल केली.प्रकरणाचा तपास करत असलेले सहायक पोलिस निरीक्षक दीपक वानखेडे यांनी सांगितले की,कसून चौकशी केल्यानंतर दोघांनी गुन्ह्याची कबुली दिली.१३ जुलै रोजी सायंकाळी ७ वाजता त्यांच्या सूचनेवरून मृतदेह शेततळ्यातून बाहेर काढण्यात आला.पोलिसांनी दोन्ही आरोपींना अटक करून त्यांच्याविरुद्ध भारतीय नागरिक सुरक्षा संहिता १०५,२३८ आणि ३(५) अन्वये गुन्हा दाखल केला आहे.
याप्रकरणी पोलिसांनी नाजुक रहांगडाले वय ५० वर्षे आणि पियुष रहांगडाले वय १९ वर्षे या दोन आरोपींना अटक केली.साकोली न्यायालयाने त्याला १६ जुलैपर्यंत पोलिस कोठडी ठोठावली आहे.या घटनेने परिसरात विविध चर्चाना ऊत आला आहे.
