मूलबाळ नसलेल्यांना संतान प्राप्तीचा दावा; ज्योतिषांना दोन वर्षांचा सश्रम कारावास…

भंडारा :-निसंतान व्यक्तींना अपत्यप्राप्ती करून देण्याचा दावा करणारे पत्रके वाटून नागरिकांची दिशाभूल करणाऱ्या दोन ज्योतिषांना लाखनी येथील न्याय दंडाधिकारी प्रथम वर्ग यांनी दोन वर्षांच्या सश्रम करावासाची व दहा हजारांची शिक्षा सुनावली. रामदास तुळशीराम वाईकर व रमेश दादाराम वाईकर रा.कारली,जि.यवतमाळ अशी त्यांची नावे आहेत.

लाखनी येथील अलंकार लॉज येथे रामदास वाईकर व रमेश वाईकर रा.कारली जि.यवतमाळ यांनी खोली भाड्याने घेतली.या दोन्ही ज्योतिषांनी स्वतःच्या नावाने पत्रके छापून ती लाखनी शहरात वाटली.या पत्रकात त्यांनी मूलबाळ नसलेल्यांना संतान प्राप्त करून देणे,पती-पत्नीचे वाद मिटवून देणे,वास्तूदोष दूर करणे,प्रेमिकांमध्ये अडचणी येत असल्यास त्यांचे निराकरण करून देऊ इत्यादी बाबी नमूद केल्या होत्या.

कोणाला काही अडचण असल्यास त्यांनी अलंकार लॉज मधील रूम नंबर १५ मध्ये येऊन संपर्क साधण्याचे आवाहन केले होते.सदर पत्रक लाखनी येथील महाराष्ट्र अंधश्रद्धा निर्मूलन समितीच्या पदाधिकारी अश्विनी दिलीप भिवगडे यांना मिळाले. त्यांनी याबाबतची माहिती महाराष्ट्र अंधश्रद्धा समितीचे जिल्हा प्रधान सचिव विष्णुदास लोणारे यांना दिली. त्यानंतर अश्विनी भिवगडे,विष्णुदास लोणारे,प्रशांत रामटेके हे अलंकार लॉज येथील ज्योतिषांना भेटायला गेले.तेव्हा ज्योतिष रामदास वाईकर व रमेश वायकर यांना अश्विनी भिवडगे यांनी त्यांच्या लग्नाला सोळा वर्षे झाली असून मूलबाळ होत नाही; असे सांगितले. तेव्हा ज्योतिषांनी येत्या पंधरा महिन्यांत तुम्हाला मूलबाळ होईल.मात्र,त्याकरिता तुम्हाला पूजा करावी लागेल,असा उपाय सुचविला.पूजेसाठी लाल कपडा, उडीद,तुळशीची पाने,जन्मपत्रिका,आठशे रुपये व इतर साहित्य आणावे लागेल असे सांगितले.त्यावेळी पन्नास रुपये रोख घेऊन सर्व साहित्य घेऊन दुसऱ्या दिवशी महाराष्ट्र अंधश्रद्धा निर्मूलन समितीने लाखनी पोलिस स्टेशनला तक्रार नोंदविण्यात आली.पोलिसांनी धाड घातली.लॉजमधून पूजेचे साहित्य,कलश,नारळ, फोटो, पंचांग इत्यादी साहित्य जप्त केले.महाराष्ट्र नरबळी आणि इतर अमानुष अनिष्ठ,अघोरी प्रथा व जादूटोणा यांना प्रतिबंध व त्याचे समूळ उच्चाटन करण्याबाबत अधिनियम २०१३ चे कलम ३ (२) सह कलम ३४ भादंविप्रमाणे गुन्हा दाखल करून ज्योतिष्य रामदास वाईकर वय ३९ वर्षे,रमेश दादाराव वाईकर वय ३४ वर्षे,रा.कारली,जि.यवतमाळ यांना अटक केली.