भरदिवसा चोरट्यांनी फळ विक्रेत्या महिलेला चाकूचा धाक दाखवित सोन्याचे दागिने पळविले…

भंडारा :-लाखनी तालुक्यातील पोहरा-पेंढरी रस्त्यावर असलेल्या फळ दुकानात जाऊन चोरट्यांनी विक्रेत्या महिलेला चाकूचा धाक दाखवित सोन्याचे दागिने लुटून नेले असल्याची घटना शनिवारी दुपारी ३ वाजताच्या सुमारास भरदिवसा घडली.यामुळे परिसरात दहशतीचे वातावरण निर्माण झाले आहे. वंदना शंकर दिघोरे वय ४७ वर्षे रा.पोहरा असे फळ विक्रेत्या महिलेचे नाव आहे.

वंदना दिघोरे यांचे पोहरा-पेंढरी रस्त्यावर फळ विक्रीचे दुकान आहे.शनिवारी दुपारी ३ वाजताच्या सुमारास तीन अनोळखी इसम दुकानात येऊन चाकूचा धाक दाखवून महिलेच्या गळ्यात असलेले सोन्याचे दागिने हिसकावले.या दागिण्यांची किंमत ३२ हजार रुपये सांगण्यात येते.

पीडित महिलेने लाखनी पोलिस स्टेशन गाठून तक्रार दाखल केली आहे.गळ्यातील दागिने पळवित

चोरट्यांनी घटनास्थळावरून पोबारा केला.शनिवारी पालांदूरचा आठवडी बाजार असताना चोरट्यांनी लाखनी-पालांदूर रस्त्यावर भरदिवसा महिलेच्या गळ्यातील दागिने हिसकावल्याने परिसरात भीतीचे वातावरण पसरले आहे.दिवाळीच्या पार्श्वभूमीवर बाजारपेठेत गर्दी होत आहे. याच गर्दीचा फायदा घेत भुरटे चोर मुद्देमाल व अन्य साहित्य लंपास करीत आहेत.पोलिसांची गस्त होत असली तरी दिवसाढवळ्या घडलेल्या या प्रकाराने परिसरात मोठी दहशत निर्माण झाली आहे.