बारावीत असतांना दोघांची मैत्री; गुन्हेगारी प्रवृत्तीमुळे ‘तिने’ संपर्क तोडल्याने वडिलाचा काटा काढला..!

नागपूर :-बारावीत असतांना दोघांची मैत्री होती.मात्र, गुन्हेगारी प्रवृत्तीमुळे तिने त्याच्याशी संपर्क तोडला. कारागृहाबाहेर आल्यानंतर तो तिला भेटायला गेला. मात्र,तिने त्याच्याशी संपर्क ठेवण्यास नकार दिल्याने संतप्त झालेल्या गुन्हेगाराने तिच्या वडिलांचा चाकूने भोसकून दिवसाढवळ्या खून केल्याची घटना काल, बुधवारी २६ मार्च रोजी दुपारी २ च्या दरम्यान नागपूर शहराच्या इमामवाडा पोलिस ठाण्याच्या हद्दीतील जाटतरोडी येथे घडली.नरेश वालदे वय ५५ वर्षे, इंदिरानगर,जाटतरोडी असे मृताचे नाव आहे,तर नीलेश ऊर्फ नाना विनोद मेश्राम वय ३५ वर्षे,रामबाग व ईश्वर ऊर्फ जॅकी सोमकुवर अशी आरोपींची नावे आहेत.नीलेश हा गुन्हेगारी प्रवृत्तीचा असून त्याच्याविरोधात अनेक गुन्हे दाखल आहेत.त्याने २०१९ साली एकाची हत्यादेखील केली होती. संबंधित तरुणीला नीलेश अनेक दिवसांपासून त्रास देत होता.मधील काळात तो शांत होता.मात्र, काही दिवसांअगोदर त्याने तिला गाठले व लग्नच कर,अशी जिद्द करू लागला.तिने त्याला नकार दिल्यावर त्याने बेदम मारहाणदेखील केली होती.तिने घरी या प्रकाराची माहिती दिली होती.नरेश यांनी आरोपी नीलेशला जाब विचारला होता व मुलीला त्रास न देण्याबाबत बजावले होते.यावरून नीलेश संतापला होता.वडिलांच्या दबावामुळेच मुलगी लग्नाला नकार देत असल्याचा त्याचा गैरसमज झाला.काल,बुधवारी २६ मार्चला दुपारी पावणेदोन वाजेच्या सुमारास नीलेश ईश्वरसोबत दुचाकीने जाटतरोडी पोलिस चौकीजवळ पोहोचला.तेथे त्यांनी नरेश यांना गाठले व शिवीगाळ करत नीलेशने त्यांच्या पोटात खंजीर भोसकला व घटनास्थळावरून दोघांनीही पळ काढला.या प्रकारामुळे परिसरात खळबळ उडाली.पोलिसांना या प्रकाराची माहिती देण्यात आली.नरेश यांना इस्पितळात नेले असता डॉक्टरांनी मृत घोषित केले.इमामवाडा पोलिस ठाण्यात नीलेश व ईश्वरविरोधात गुन्हा दाखल करून दोघांचाही शोध घेत पोलिसांनी दोघांनाही अटक केली आहे.

आरोपी नीलेशने वालदे यांच्या हत्येनंतर फोटो घेतला व तो इन्स्टाग्रामवर अपलोड केला. ‘बेबी मी बघ काय केले आहे’ असे त्याने कॅप्शन लिहिले व तुटलेल्या हृदयाचे इमोजी टाकले.नीलेशच्या फ्रेंडलिस्टमधील काही जणांनी त्याला लाइकदेखील केले.त्याच्या या कृतीमुळे पोलिसदेखील अवाक् झाले आहेत.