‘लालच बुरी बला’..! आदिवासींसाठी एकेकाळी देवदूत ठरले; पण पैश्याच्या लालचेने सर्वकाही गमावून बसले..!

गडचिरोली :-जिल्ह्यातील आरोग्यव्यवस्थेचे धिंडवडे निघाले असतांना १५ जुलै २०२४ रोजी भामरागड तालुक्यातील लाहेरी प्राथमिक आरोग्य केंद्रात कार्यरत वैद्यकीय अधिकारी डॉ.संभाजी देवराव भोकरे हे स्वतः मलेरियाग्रस्त असतांना एका हाताला सलाईन व दुसऱ्या हाताने रुग्णास प्रीस्क्रिप्शन लिहून कर्तव्यपूर्ती करतांनाचे छायाचित्र समाजमाध्यमांवर व्हायरल होऊन त्या कालावधीत आदिवासींसाठी देवदूत ठरल्याची वाहवाही त्यांनी मिळवली होती.मात्र, ‘लालच बुरी बला है’ याचा खरा प्रत्यय त्यांच्या बाबतीत घडलेला असून पैश्याच्या लालचेने डॉ.भोकरे सर्वकाही मिळवलेली प्राण प्रतिष्ठा गमावून बसले आहेत.भोकरे यांनी लाच स्वीकारली अन् ते अलगदच एसीबीच्या सापळ्यात अडकले.

याबाबत अधिक माहिती अशी की,लाहेरी प्राथमिक

आरोग्य केंद्रातील एका आरोग्य सहाय्यकाचे फेब्रुवारी २०२४ ते सप्टेंबर २०२४ व नोव्हेंबर महिन्यातील १४ दिवसांचे थकीत पगाराचे पुरवणी बिल मंजूर करण्याकरीता कार्यालयीन प्रमुख म्हणून डॉ.संभाजी भोकरे यांचे ना हरकत प्रमाणपत्र आवश्यक होते. प्रमाणपत्रासाठी डॉ.भोकरे यांनी २ मार्च २०२५ रोजी १ लाख ५० हजार रुपयांची मागणी केली. तडजोडीअंती १ लाख ३० हजार रुपये देण्याचे ठरले. मात्र,तक्रारदारास लाच देण्याची इच्छा नसल्याने त्यांनी याबाबत लाचलुचपत प्रतिबंधक विभाग गडचिरोली येथे तक्रार नोंदवली.त्यानुसार मंगळवारी २५ मार्चला एसीबीच्या पथकाने पडताळणी केली.तडजोडीअंती १ लाख ३० हजार रुपये काल,बुधवार २६ मार्च रोजी डॉ.संभाजी भोकरे याने स्वीकारताच लाच लुचपत प्रतिबंधक विभागाच्या पथकाने झडप घालून आरोपी वैद्यकीय अधिकारी डॉ.भोकरे याच्या विरूध्द पोलीस स्टेशन गडचिरोली येथे गुन्हा दाखल करून अटक करण्यात आली आहे.