पोलिसांनी पकडले सुगंधीत तंबाखूचे मोठे १० पोते..

गोंदिया :-सध्याच्या घडीला राज्याच्या विविध भागात अवैध सुगंधित तंबाखू,गुटखा व इतर मादक पदार्थ विक्री तथा त्याची वाहतूक करणाऱ्यांवर कारवाईचा सपाटा सुरू असतांनाच गोंदिया जिल्ह्याच्या सालेकसा तालुक्यातील रोंढा गावाजवळील नाल्याजवळ

पोलिसांनी मोठी कारवाई करत सुगंधित तंबाखूची वाहतूक करणाऱ्यांच्या मुसक्या आवळून सुगंधीत तंबाखूचे मोठे १० पोते जप्त केले.जप्त केलेल्या एकूण मालाची किंमत ८ लाख ५० हजार रुपये असून याप्रकरणी पिकअप वाहनचालक महेश सुशील नेवारे वय ४१ वर्षे,रा.बहेला,ता.लांजी,जि.बालाघाट(मध्य प्रदेश) व जगदीश लहुलाल भोयर वय ३८ वर्षे,रा.अंधियाटोला, ता.लांजी,जि.बालाघाट यांच्याविरुद्ध अन्नसुरक्षा व मानके कायदा २००६ नुसार सालेकसा पोलीस ठाण्यात गुन्हा नोंद करण्यात आला आहे.

बालाघाट जिल्ह्यातून एका पांढऱ्या रंगाच्या पिकअप वाहनातून गोंदिया जिल्ह्यात अवैधरीत्या सुगंधित तंबाखूची खुलेआम वाहतूक केली जात असल्याची गोपनीय माहिती काल शुक्रवारी सालेकसा पोलिसांना मिळाली होती.मिळालेल्या गोपनीय माहितीच्या आधारे सालेकसा पोलीस ठाण्याचे ठाणेदार रवि नागोसे यांच्या नेतृत्वात पोलिस हवालदार तूरकर,पोलीस नाईक कान्सकर,पोलीस शिपाई वेदक व बैस यांनी एमएच ३५ एजे१०४२ क्रमांकाच्या पिकअप वाहनास रोंढा गावाजवळील नाल्याजवळ थांबवून वाहनाची तपासणी केली असता,त्यात १० मोठ्या पांढऱ्या रंगाचे पोत्यांमध्ये प्रत्येकी ५० नग आर.के.सुपर प्रीमियम क्वालिटी हुक्का सुगंधित तंबाखूचे पॅकेट,दोन हजार नग,आर.के.सुपर प्रीमियम क्वालिटी हुक्का सुगंधित तंबाखूचे पॅकेट,५० नग एम.डी सात सुपर प्रीमियम क्वालिटी हुक्का सुगंधित तंबाखूचे पॅकेट,एक हजार आर.के.सुपर प्रीमियम क्वालिटी हुक्का सुगंधित तंबाखूचे पॅकेट असा एकूण ८ लाख ५० हजार रुपयांचा मुद्देमाल जप्त करण्यात आला. प्रकरणी सदरच्या सुगंधित तंबाखूची विक्री कोठे करण्यात येणार होती व खरेदीदार कोण?याचा तपास सालेकसा पोलिसांकडून सुरू करण्यात आला आहे.