उद्रेक न्युज वृत्त
अर्जुनी मोरगाव(गोंदिया) :-आरोपीला उपचाराकरिता रुग्णालयात नेले असता त्याने पोलिसांच्या हातावर तुरी देऊन पलायन केले. पोलिसांच्या दृष्टीस येऊ नये म्हणून त्याने अंगावरील कपडे काढून चिखल माखला व जंगलातील गर्द दाट झुडपात दडून बसला.अखेर सहा तासांत सी ६० जवानांनी स्थानिक पोलिसांच्या सहकार्याने आरोपीला बुधवारी (दि.२४) दुपारी ४:३० च्या सुमारास बोदरा जंगल परिसरात पकडण्यात यश आले.
आईच्या प्रियकराला ठार केल्याप्रकरणी बोंडगावदेवी येथील भीमसेन माणिक रामटेके वय १९ वर्षे याला पोलिसांनी ताब्यात घेतले.तो पोलिस कोठडीत असताना बुधवारी सकाळी त्याने छातीत दुखत असल्याची पोलिसांकडे तक्रार केली.पोलिसांनी सकाळी ८:४५ वाजताच्या सुमारास त्याला अर्जुनी मोरगावच्या ग्रामीण रुग्णालयात नेले.डॉक्टरांनी तपासणी केल्यानंतर त्याला भरती करण्यात आले. त्याला सलाइन लावली.१०:३० वाजता त्याने उलटी येत असल्याचा बहाणा केला.पोलिसांनी त्याला सलाइनसह रुग्णालयाबाहेर नेले.त्याचवेळी पोलिसांच्या हातावर तुरी देऊन तो सलाइनसह पळाला.पळताना त्याने सलाइन ओढून फेकून दिली. पोलिसांनी त्याचा पाठलाग केला.एका ठिकाणी शेवाळ असल्याने पाय घसरून पोलिस पडला.त्याच्या डोक्याला दुखापत झाली. दुसऱ्या पोलिसानेसुद्धा पाठलाग केला.पण आरोपी हाती लागला नाही.पाठीमागील आवार भिंतीवरून उडी घेत तो जंगलाच्या दिशेने पळून गेला.पोलिसांनी आजूबाजूच्या सर्व पोलिस ठाण्यांना सूचना केली सी ६० जवानांच्या पथकाला पाचारण केले.जंगल परिसरात पोलिसांनी शोध मोहीम राबवली.पोलिसांच्या दृष्टीस येऊ नये म्हणून आरोपीने अंगावरील कपडे काढले व अंगाला चिखल लावून घेतला.तो दाट गर्द झुडपात दडून बसला.परंतु पोलिसांच्या नजरेतून तो सुटू शकला नाही.पोलिसांनी अखेर त्याला पकडले.
बुधवारी सकाळपासूनच पावसाची रिपरिप सुरूच होती.या पावसामुळे पोलिसांच्या शोधकार्यात बाधा उत्पन्न होत होती.आरोपी सुद्धा जास्त लांब जाऊ शकला नाही.आरोपीला नशापाणी करण्याची सवय असल्याचे समजते.यापूर्वी सुद्धा त्याला एका गुन्ह्यात अटक करण्यात आली होती.पोलिसांच्या तावडीतून आरोपी पळून गेल्यामुळे अर्जुनी मोरगाव पोलिस ठाण्यात २६२ भारतीय न्याय संहिता (बीएनएस)नुसार गुन्हा दाखल करण्यात आला आहे.अर्जुनी मोरगावच्या ग्रामीण रुग्णालयात सीसीटीव्ही कॅमेरे असूनही ते बंद अवस्थेत आहेत.
