नैनपूर येथे ‘सामान्य ज्ञान’ स्पर्धेद्वारे शिवजयंती साजरी..

देसाईगंज(गडचिरोली):-छत्रपती छत्रपती शिवाजी महाराज यांच्या जयंती दिनाचे औचित्य साधून आज, गुरुवार १९ फेब्रुवारीला देसाईगंज शहराच्या नैनपूर येथील महात्मा गांधी नगर परिषद उच्च प्राथमिक शाळा येथे जगदंब ग्रुपच्या विद्यमाने भव्य ‘सामान्य ज्ञान’ स्पर्धेचे आयोजन करून शिवजयंती मोठ्या उत्साहात साजरी करण्यात आली.विशेष म्हणजे, नैनपूरमधील विद्यार्थ्यांच्या बौद्धिक विकासासाठी आयोजित या स्पर्धेत शिवकालीन इतिहास,गडकिल्ले,स्वराज्याची प्रशासन व्यवस्था या विषयांवर आधारित प्रश्न विचारण्यात आले होते.विद्यार्थ्यांनी उत्स्फूर्त प्रतिसाद देत मोठ्या उत्साहाने सहभाग नोंदवून आपल्या ज्ञानाचे प्रभावी प्रदर्शन केले.

स्पर्धेच्या उद्घाटनप्रसंगी शाळेचे मुख्याध्यापक खेमराज तिघरे प्रामुख्याने उपस्थित होते.तसेच शिक्षक गहाणे, शिक्षिका तृषाली,अपर्णा,प्राची व प्रियंका यांनी उपस्थित राहून विद्यार्थ्यांचे मनोबल वाढवले.यावेळी जगदंब ग्रुपचे सर्व सदस्य मोठ्या संख्येने उपस्थित होते.

उद्घाटनप्रसंगी बोलतांना मुख्याध्यापक खेमराज तिघरे यांनी विद्यार्थ्यांना धैर्य,न्याय,नियम आणि राष्ट्रप्रेम ही छत्रपती शिवाजी महाराजांची चार मूलभूत मूल्ये अंगीकारण्याचे आवाहन केले. “शिवराय केवळ इतिहासातच नाही,तर ते विचारात असून त्यांचे विचार आत्मसात केल्यासच खऱ्या अर्थाने शिवजयंती साजरी होईल,”असे त्यांनी नमूद केले.कार्यक्रमाचे सूत्रसंचालन व आभार प्रदर्शन शिक्षक मंगेश तुपट  यांनी अत्यंत प्रभावीपणे केले.तर नैनपूर येथील तरुणांनी एकत्र येत राबवलेल्या या शैक्षणिक उपक्रमाचे ग्रामस्थांकडून विशेष कौतुक करण्यात येत आहे.