निर्दयी माता; पोटच्या गोळ्याला बेवारस सोडले..!

भंडारा :-नुकतेच जिल्ह्याच्या तुमसर तालुक्यातील गोबरवाही पोलिस ठाण्याच्या हद्दीत येणाऱ्या कटंगी मार्गावरील शिवतीर्थ परिसरातील दुर्गा मातेच्या मंदिरात एका दिवासाचे नवजात बाळ मृतावस्थेत आढळून आल्याने परिसरात एकच खळबळ उडाली होती.मानवी मनाला कीव येईल अशी धक्कादायक घटना मंगळवार ३० डिसेंबर २०२५ रोजी सकाळच्या सुमारास राजापूर-नाकाडोंगरी येथील मुख्य मार्गावरील श्री क्षेत्रात उघडकीस आली होती.मॉर्निंग वॉककरीता मंदिराच्या खुल्या परिसरात फेरफटका मारणाऱ्या स्थानिक नागरिकांना सदरची बाब लक्षात येताच तात्काळ गोबरवाही पोलिसांना घटनेची माहिती देण्यात आली होती.परिसरातील दुर्गा मातेच्या अलगद पायाजवळ कापडात गुंडाळून ठेवलेल्या त्या निष्पाप जीवाला कोण तिथे सोडून गेला?अश्या चर्चांना पूर्णविराम मिळालेला नसतांनाच परत काल मंगळवारी दुपारच्या सुमारास लाखनी तालुक्याच्या मानेगाव(सडक)येथील शेतशिवारालगतच्या नाल्याजवळ एका नवजात स्त्री जातीचे जिवंत बाळ चक्क स्कूल बॅगमध्ये बेवारस आढळून आल्याने परिसरात एकच खळबळ माजली. प्रकरणी लाखनी पोलीस ठाण्याचे पीआय सुभाष बारसे यांना घटनेची माहिती मिळताच घटनास्थळी दाखल होत तातडीने बाळाला लाखनी येथील ग्रामीण रुग्णालय दाखल केले.बॅगमध्ये आढळून आलेले बाळ हे आठ ते दहा दिवसांचे असल्याचे प्राथमिक तपासात समोर आले आहे.ग्रामीण रुग्णालयात प्रथमोपचार केल्यानंतर बाळास भंडारा जिल्हा सामान्य रुग्णालयात पाठविण्यात आले. एखादी आई आपल्या पोटच्या गोळ्याला जन्मताच वा ममतेची छाया मिळण्यापूर्वीच असे बेवारसपणे फेकून देणे वा आपल्या छायेपासून दूरवर ठेवत असेल तर.. याच्यापेक्षा महाघोरकलयुग कोणता?अशी म्हणण्याची वेळ आली आहे.चिमुकलीला बेवारसपणे फेकणाऱ्या निर्दयी मातेचा शोध लावण्यात पोलिसांपुढे मोठे आव्हान उभे असून प्रकरणाचा पुढील तपास मिलिंद गभणे व कऱ्हाडे करीत आहेत.