नाट्य दिग्दर्शक तथा उपक्रमशील शिक्षकाचा अपघात; शिक्षकाचा जागीच मृत्यू तर पत्नी जखमी..

चंद्रपूर :-पती-पत्नी पॅथॉलॉजीतून रक्त तपासणी करून घराकडे दुचाकीने निघाले असतांना वाटेतच सिंदेवाही शहरातील राष्ट्रीय महामार्गावरील महाजन इंडेन गॅस एजन्सी जवळ त्यांच्या दुचाकीला मागेहून भरधाव वेगात असलेल्या ट्रकने जोरदार धडक दिली.यात दोघेही पती-पत्नी रस्त्यावर कोसळले. रत्यावर कोसळताच डोक्याला जबर मार लागल्याने शिक्षक पतीचा जागीच मृत्यू झाला तर पत्नी किरकोळ जखमी झाली.नाट्य दिग्दर्शक तथा सिंदेवाही तालुक्यातील जिल्हा परिषद शाळा गुंजेवाही येथील उपक्रमशील शिक्षक डॉ.प्रेमकुमार खोब्रागडे वय ५५ वर्षे असे अपघातात मृत्यू झालेल्या शिक्षकाचे नाव आहे तर पत्नी देवांगणा खोब्रागडे वय ४८ वर्षे ह्या जखमी झाल्या.सदरची घटना काल,गुरुवारी दुपारच्या सुमारास घडली.

डॉ.प्रेमकुमार खोब्रागडे आणि त्यांच्या पत्नी सिंदेवाही येथील सहारे पॅथॉलॉजी येथे रक्त तपासणीसाठी गेले होते.तपासणी पूर्ण करून एम.एच.३४ व्ही ३३२४ क्रमांकाच्या दुचाकीवरून घराकडे निघाले.दरम्यान, मागून भरधाव वेगाने आलेल्या एम.एच.४० सी.एम. ३८५७ क्रमांकाच्या ट्रकने दुचाकीला जोरदार धडक दिली व अपघातानंतर चालक ट्रक घेऊन फरार झाला.

धडकेत दुचाकीवरील नियंत्रण सुटून दोघेही रस्त्यावर पडले.यामध्ये प्रेमकुमार खोब्रागडे यांच्या डोक्याला गंभीर मार लागल्याने जागीच मृत्यू झाला,तर पत्नी किरकोळ जखमी झाल्या.मात्र,ठाणेदार विजय राठोड यांनी सीसीटीव्हीच्या आधारे पाठलाग करून मूल तालुक्यातील चितगावात चालकास ताब्यात घेतले.डॉ.खोब्रागडे हे पुरोगामी सामाजिक चळवळीत सक्रीय होते.