दुचाकी आणि चारचाकी वाहनाची समोरासमोर धडक; दोन तरुणांचा घटनास्थळीच मृत्यू..

चंद्रपूर :-जिल्ह्याच्या मूल तालुक्यात दुचाकी आणि चारचाकी वाहनाची समोरासमोर धडक होऊन दोन तरुणांच्या डोक्याला जबर मार लागल्याने दोघांचाही घटनास्थळीच मृत्यू झाल्याची घटना आज,गुरुवार ११ डिसेंबर रोजी दुपारी साडेतीन वाजेच्या सुमारास मूल-चिचाळा मार्गावरील महाबीज केंद्राजवळ घडली.अनिल मडावी वय ३७ वर्षे व मुन्ना पोरते वय ३५ वर्षे दोघेही रा.थेरगांव,ता.मूल,जि.चंद्रपूर असे अपघातात मृत पावलेल्या तरुणांची नावे आहेत.

अनिल मडावी व मुन्ना पोरते हे आज गुरुवारी दोघेही एमएच ३४ बीपी ९०३५ क्रमांकाच्या दुचाकीने मूल येथे काही कामानिमित्त गेले होते.कामे आटोपून आपल्या गावी परत जात असतांनाच ताडाळा कडुन मूलकडे येत असलेल्या एमएच ३४ बीझेड ३३२३ क्रमांकाच्या

चारचाकी वाहन व दुचाकी वाहनाची समोरासमोर धडक झाली.धडक इतकी भीषण होती की दुचाकीस्वार तरुण जागीच ठार झाले.घटना घडताच चारचाकी वाहनचालक घटनास्थळावरून पसार झाला.लागलीच घटनेची माहिती मूल पोलीस प्रशासनास मिळताच ठाणेदार विजय राठोड यांच्या मार्गदर्शनाखाली एपीआय सुबोध वंजारी यांनी घटनास्थळ गाठुन घटनेचा पंचनामा केला व मृतकांचे शव उत्तरीय तपासणीसाठी मूल उपजिल्हा रुग्णालयात पाठविले.प्रकरणी घटनास्थळावरून पसार झालेल्या वाहनाचा शोध घेऊन चारचाकी वाहन चालकावर गुन्हा दाखल करण्याची प्रक्रिया सुरू होती.घटनेचा पुढील तपास मूल पोलीस ठाण्याचे सहाय्यक अंमलदार केळझरकर करीत आहेत.