दुचाकीला धडक; आईचा जागीच मृत्यू तर मुलगा थोडक्यात बचावला..

भंडारा :-जिल्ह्याच्या तुमसर तालुक्यातील सिहोरा पोलीस ठाण्याच्या हद्दीतील सितेपार गावालगत आज,शनिवार १३ डिसेंबरला सकाळच्या सुमारास भीषण अपघाताची घटना घडली.मुलगा व त्याची आई दुचाकीने जात असतांना दुचाकीला टिप्परची धडक होऊन आई आणि मुलगा खाली कोसळताच आईच्या डोक्यावरून चालत्या टिप्परचे चाक गेल्याने तिचा घटनास्थळीच मृत्यू झाला,तर मुलगा थोडक्यात बचावून किरकोळ जखमी झाला.निलाबाई फंदु कटनकार वय ७० वर्षे,रा.चुल्हाड,ता.तुमसर,जि.भंडारा असे मृत पावलेल्या आईचे नाव असून विलास फंदु कटनकार असे अपघातातील जखमी मुलाचे नाव आहे.प्रकरणी गोंदेखारी येथील रमेश बनकर यांच्या मालकीचा असलेला टिप्पर सिहोरा पोलिसांनी ताब्यात घेत चालक धर्मेंद्र राऊत रा.गर्रा बघेडा,ता.तुमसर याच्यावर गुन्हा दाखल केला आहे.

निलाबाई आणि तिचा मुलगा विलास हे दोघेही एमएच ३६ एक्यू ७९८३ क्रमांकाच्या दुचाकीने मुंढरी गावी जाण्यासाठी निघाले होते.अश्यातच सितेपार गावालगत येताच सितेपारकडून एमएच ४० बीजी ०१८० क्रमांकाचा टिप्पर भरधाव वेगाने येत दुचाकीला धडक दिली.यात दोघेही खाली पडले. निलाबाई रस्त्याच्या भागावर पडल्याने तिच्या डोक्यावरून टिप्परचा चाक गेला.यातच तिचा मृत्यू झाला.घटनेची माहिती सिहोरा पोलीस ठाण्यास मिळताच सिहोराचे पोलीस निरीक्षक विजय कसोधन यांनी घटनास्थळ गाठून अपघातातील टिप्पर ताब्यात घेतले.प्रकरणाचा पुढील तपास पीएसआय चेतन पटले करीत आहेत.