रेगडी येथे बँक सेवा सुरू करा-शिंदे सेनेचे जिल्हा सचिव प्रशांत शाहा

गडचिरोली :-सध्याच्या घडीला गोर-गरीबांपासून ते सर्वांकडे बँकेचे खाते आहेत.अनेकजण मोठ्या प्रमाणावर बकेचे व्यवहार करीत असतात.अश्यातच बँकेचे व्यवहार करतांना बँकेच्या सोयी-सुविधा जवळपास असणे गरजेचे असते.मात्र,गडचिरोली जिल्ह्याच्या चामोर्शी तालुक्यातील प्रमुख व वाढत्या लोकसंख्येचा विचार करता रेगडी व परिसरातील नागरिकांना बँकांच्या आर्थिक व्यवहारांसाठी कोसोदुर जाव लागत असल्याने नागरिकांच्या सोयीसाठी तसेच गैरसोय होऊ नये,याकरीता परिसरातील मुख्य स्थान असलेल्या रेगडी येथे त्वरित बँक शाखा सुरू करण्याची मागणी शिंदे सेनेचे गडचिरोली जिल्हा सचिव प्रशांत शाहा यांनी केली आहे.याबाबत काही दिवसांपूर्वीच को-ऑपरेटिव्ह बँकेचे संचालक पोरेड्डीवार यांना निवेदनाद्वारे मागणी केली असून याबाबत गडचिरोली जिल्हाधिकाऱ्यांना निवेदन सादर करण्यात येणार असल्याचे  त्यांनी सांगितले.

चामोर्शी तालुक्यातील रेगडी हे गाव मुख्य केंद्रस्थान असलेले गाव असून गावाला लागून गरंजी,कर्मे, कोंदावाही,वेंगनूर,विकासपल्ली,माडेआमगाव,मकेपल्ली, पोतेपल्ली,पुसगुडा,बोलेपल्ली,देवदा, मोरखंडी अशा अनेक गावांचा समावेश होतो.या सर्व गावांचा दैनंदिन आर्थिक व्यवहार रेगडीमार्फत होत असला तरीही येथे अद्याप बँक शाखेचा अभाव असल्याने विद्यार्थ्यांपासून शेतकऱ्यांपर्यंत सर्वसामान्यांना अडचणींचा सामना करावा लागतो.विशेष म्हणजे,रेगडी येथे शासकीय आश्रमशाळा,पोलिस स्टेशन,जिल्हापरिषद शाळा, महाविद्यालय,आरोग्य केंद्र अशा महत्त्वाच्या शासकीय संस्था असूनही या ठिकाणी बँक सेवा उपलब्ध नसणे हा गंभीर मुद्दा असल्याचे शाहा यांनी सांगितले.

“रेगडी येथे तात्काळ बँक शाखा सुरू करण्यात यावी; अन्यथा आम्हाला आंदोलनाचा मार्ग अवलंबावा लागेल,” असा ठाम इशारा प्रशांत शाहा यांनी प्रशासनाला दिला आहे.स्थानिक नागरिकांमध्येही या मागणीबाबत तीव्र नाराजी असून लवकरात लवकर निर्णय घेण्याची अपेक्षा व्यक्त केली जात आहे.