दुचाकीची पीकअपला जोरदार धडक; तरुणाचा जागीच मृत्यू.. – देसाईगंजच्या कुरुड फाट्यावरील आजची घटना..

देसाईगंज(गडचिरोली):-देसाईगंज तालुका मुख्यालयापासून चार किलोमीटर अंतरावर असलेल्या कुरुड फाटा बसस्थानक नजीक दुचाकीची समोरून येणाऱ्या पीकअपला जोरदार धडक बसल्याने घडलेल्या अपघातात २० वर्षीय तरुणाचा जागीच मृत्यू झाल्याची घटना आज,गुरुवार १३ ऑगस्ट रोजी सकाळी पावणे अकरा वाजेच्या सुमारास घडली.साहिल दिपक पेंद्राम वय २० वर्षे असे अपघातात मृत पावलेल्या तरुणाचे नाव असून पेंद्राम कुटूंबीय मूळचे गडचिरोली जिल्ह्याच्या आरमोरी तालुक्यातील वैरागड येथील रहिवासी आहेत. तर मृतक साहिलचे वडील दिपक पेंद्राम हे कुरुड येथील जिल्हा परिषद हायस्कूल शाळेत प्रयोगशाळा सहाय्यक पदावर कार्यरत असल्याने ते गेल्या आठ ते दहा वर्षांपासून देसाईगंज तालुक्याच्या कुरुड येथे वास्तव्यास आहेत.

माहितीनुसार,साहील हा आज गुरुवारच्या सकाळी साडे दहाच्या सुमारास एकटाच दुचाकीने कुरुड येथून देसाईगंजला काही कामानिमित्त जाण्यासाठी निघाला होता.दरम्यान,कुरुड फाटा नजीक दुचाकीने पोहचताच देसाईगंज-आरमोरी मार्गावर डाव्या बाजूला काही वाहने उभी असल्याने त्याने दुचाकी समोर घेण्याचा प्रयत्न केला.याचवेळेस कुरुड येथील एक पीकअप वाहन नायरा पेट्रोल पंपावरून डिझेल भरून लोहा घेऊन शिवराजपुर मार्गे कोकडी येथे जाण्यासाठी निघाला असता दुचाकीची पीकअपला जोरदार धडक बसली.यात साहिलच्या डोक्याला जबर मार लागल्याने डोक्यातून मोठ्या प्रमाणावर रक्तस्त्राव होऊन काही वेळातच त्याचा घटनास्थळीच मृत्यू झाला.घटना घडताच नागरिकांनी घटनास्थळी धाव घेत मदतकार्य सुरू करून कुरुड गावातील पोलीस पाटील मंगेश मडावी यांना माहिती दिली.मडावी यांनी तात्काळ घटनास्थळ गाठून घटनेबाबत देसाईगंज पोलिसांना पाचारण केले. पोलिसांनी घटनास्थळी दाखल होत पंचनामा करून मृतदेह उत्तरीय तपासणीसाठी देसाईगंज ग्रामीण रुग्णालयात दाखल केला.पुढील तपास देसाईगंज पोलीस प्रशासन करीत असून  साहिलच्या अचानक जाण्याने पेंद्राम कुटूंबीयांवर मोठा आघात झाला आहे.