चिखलीच्या आंचिव हायस्कूल येथील सावित्रीच्या लेकिंना सायकलींचे वितरण..

कुरखेडा(गडचिरोली):-कुरखेडा तालुक्याच्या चिखली येथील आंचिव हायस्कूलच्या तब्बल २९ सावित्रीच्या लेकिंना शाळेचे मुख्याध्यापक डहाडे,शाळेचे शिक्षकवृंद कर्मचारी पालक महेश बनोठे,प्रल्हाद सहारे गुलाब टेंभुर्णे,मनेश मडावी,गोपाल लाडे,जानबा भोंडे यांच्या प्रमुख उपस्थितीत विजयादशमीच्या(दसरा)दिवशी सायकली प्रदान करण्यात आल्या.

चिखली येथील आंचिव शाळेत आजूबाजूच्या गाव परिसरातील मुली शिक्षण घेत असून दररोज कितीतरी किलोमिटर अंतर पायदळी तुडवून शाळेत येत असतात. सदरची बाब शाळेचे मुख्याध्यापक तसेच शिक्षकवृंदांच्या निदर्शनास आली.त्यानुसार शाळेच्या वतीने शिक्षणासाठी पायदळ येणाऱ्या मुलींचा शोध घेण्यात आला असता यात शाळेतील तब्बल २९ विद्यार्थिनी आढळून आल्या. शाळेच्या वतीने क्षणाचाही विलंब न लावता मानव विकास मिशन योजनेअंतर्गत प्रस्ताव तयार करण्यात आले.त्यानंतर जिल्हा प्रशासनास प्रस्ताव पाठवून विद्यार्थिनींची निकड लक्षात घेता सायकलींचे वाटप करण्यात आले.मानव विकास मिशनच्या माध्यमातून विद्यार्थिनींना शालेय शिक्षणाची गोडी निर्माण व्हावी आणि शालेय उपस्थितीत वाढ करणे आहे.सायकलींचे वाटप करतेवेळी उपस्थित मान्यवरांनी विद्यार्थिनींच्या उज्ज्वल भविष्यासाठी शुभेच्छा दिल्या.