उद्रेक न्युज वृत्त
भंडारा :-सदनिका विक्रीच्या माध्यमातून ग्राहकांशी गैरव्यवहार करण्याचा प्रकार एका माजी नगरसेवकाला चांगलाच अंगलट आला आहे.जिल्हा ग्राहक मंचच्या आदेशावरून त्याची तुरुंगात रवानगी करण्यात आली आहे.विशेष म्हणजे,तक्रारदारास दोन कोटी रुपये देण्याचे आदेश ग्राहक मंचने दिले आहेत.याच माजी नगरसेवकाला अशाच एका प्रकरणात ग्राहक मंचाने तीन वर्षाची शिक्षा सुनावल्याची माहिती आहे.नितीन रामचंद्र धकाते असे या माजी नगरसेवकाचे नाव आहे.
भंडारा नगरपरिषदेचे माजी नगरसेवक नितीन धकाते यांनी खोकरला भागात साई वात्सल्य अपार्टमेंट या बहुमजली इमारतीचे बांधकाम हाती घेतले.एका अपार्टमेंटमध्ये ९ सदनिका तयार करण्याची परवानगी असतानाही १२ सदनिका तयार करून त्या १२ लोकांना विकण्याचा प्रताप त्याने केला.१६ वर्षांपूर्वी सुरू झालेल्या या अपार्टमेंटचे काम अजूनही अपूर्णच आहे.
सदनिका विकत घेण्यासाठी पैसे देणाऱ्या ग्राहकांची फसवणूक झाल्याचे लक्षात येताच ग्राहकांनी या माजी नगरसेवकाला पैसे परत मागणे सुरू केले.परंतु,पैसे परत देत नसल्यामुळे या ग्राहकांनी जिल्हा ग्राहक मंचात प्रकरण दाखल केले.काहींनी वैयक्तिक, तर काहींनी सामूहिक प्रकरणे दाखल केली.अशी चार प्रकरणे त्याच्याविरुद्ध ग्राहक मंचात आहेत.
यातील सुमित कपूर यांच्या प्रकरणात या माजी नगरसेवकाला तीन वर्षाचीशिक्षा ठोठावण्यात आली होती.जानेवारी २०२३ रोजी जिल्हा ग्राहक मंचने आदेश दिले होते.परंतु,अटके संदर्भात पोलिसांकडून टाळाटाळ केली जात असल्याने ग्राहक मंचने पोलिसांच्या कार्यप्रणालीवर ताशेरे ओढले होते.अन्य १४ व्यक्तींच्या प्रकरणांमध्ये जिल्हा ग्राहक मंचाने १८ टक्के व्याजासह दोन कोटी रुपयांची रक्कम ग्राहकांना परत करावी; असा आदेश दिला आहे.मात्र,या आदेशाचे पालन न केल्यामुळे न्यायालयाने त्याच्याविरुद्ध अटक वॉरंट काढला होता.
