उद्रेक न्युज वृत्त
नागपूर :-जिल्ह्यातील ग्रामीण भागातील तीन नवीन प्राथमिक आरोग्य केंद्रांचे लोकार्पण होत असताना शुक्रवारी नरखेड तालुक्यातील मोवाड येथील प्राथमिक आरोग्य केंद्रातील वैद्यकीय अधिकारी डॉ. प्रवीण उमरगेकर यांनी कार्यालयीन वेळेत दारू ढोसल्याने मृत्यूशी झुंज देत असलेल्या महिलेला वेळेत वैद्यकीय उपचार मिळू शकले नाहीत.कर्तव्यावर असताना दारू प्याल्याचे आढळून आल्याने डॉ.प्रवीण उमरगेकर यांना निलंबित करण्यात आले आहे.
डॉक्टर दारू प्याल्याने महिलेवर वेळीच उपचार झाले नाही.या प्रकारामुळे मोवाड प्राथमिक आरोग्य केंद्र परिसरात काही काळ तणावाची परिस्थिती निर्माण झाल्याबाबत होती.दरम्यान,काल शनिवारी जिल्हा परिषदेच्या सर्वसाधारण सभेत सदस्य समीर उमप व सलील देशमुख यांनी दोषी वैद्यकीय अधिकाऱ्यांवर कारवाईची मागणी केली.यावर प्रशासनाने प्रवीण उमरगेकर यांना निलंबित करण्यात आल्याची माहिती दिली.यावेळी सदस्यांनी त्यांच्या सर्कलमधील प्राथमिक आरोग्य केंद्रात आठवड्यातील काही दिवस डॉक्टर उपस्थित राहात नसल्याचे म्हटले.
मोवाड प्राथमिक आरोग्य केंद्रात दोन वैद्यकीय अधिकारी कार्यरत आहे.डॉ.मयूर बोपचे यांच्याकडे या प्राथमिक आरोग्य केंद्राचा कार्यभार असून,डॉ.प्रवीण उमरगेकर हे दुसरे वैद्यकीय अधिकारी आहेत.
दोन्ही वैद्यकीय अधिकारी आपल्या सोयीने तीन-तीन दिवस कर्तव्य बजावतात.शुक्रवारी उमरगेकर यांची ड्यूटी असताना ते दारू प्याले असल्याने विष प्राशन केलेल्या महिलेवर उपचार करता आले नाही.या घटनेमुळे संतप्त लोकांनी प्राथमिक आरोग्य केंद्रात गोंधळ घातला होता.
