गिटार शिकवणी वर्ग चालकाचा अल्पवयीन मुलीवर सातत्याने अत्याचार..! -पोलिसांनी आवळल्या मुसक्या..

नागपूर :-रॉकस्टार अकॅडमी नावाने गिटारचे शिकवणी वर्ग चालविणाऱ्या एका २७ वर्षीय नराधमाने अल्पवयीन मुलीवर अत्याचार केल्याची घटना उघडकीस आल्याने परिसरात एकच खळबळ माजली आहे.आरोपी इतक्यावरच थांबला नाही,तर बंदुकीचा धाक दाखवून तिच्या कुटुंबीयांना जिवे मारण्याची धमकी देत सातत्याने अत्याचार केले.त्रास असह्य झाल्याने मुलीने कुटुंबीयांना आपबिती सांगितली.त्यानुसार कुटुंबीयांनी पोलीस ठाण्यात धाव घेत तक्रार दाखल केली.प्रकरणी सोनेगाव पोलिसांनी आरोपीच्या मुसक्या आवळल्या.सागर सिंग परोसिया ऊर्फ सॅमसंग वय २७ वर्षे, सिव्हिल लाइन्स असे आरोपीचे नाव आहे.तो उज्ज्वलनगर येथील सनशाइन अपार्टमेंटच्या तिसऱ्या माळ्यावर रॉकस्टार अकॅडमी नावाने गिटारचे क्लासेस चालवितो.

पीडित अल्पवयीन मुलीने गिटार शिकण्यासाठी जून महिन्यात रॉकस्टार अकॅडमीत क्लास लावला. सुरुवातीला आरोपी सागरने अल्पवयीन मुलीशी जवळीकता साधण्याचा प्रयत्न केला.त्यानुसार तो चांगला वागू लागला.मात्र,त्यानंतर एके दिवशी त्याने तिला क्लासच्या कोपऱ्यात नेले व तिच्याशी अश्लील चाळे करत घाणेरडे स्पर्श करण्याचा प्रयत्न केला. सदरची बाब खटकल्याने मुलीने तिथेच गिटार सोडली व ती क्लासमधून निघून गेली.२३ जुलै रोजी आरोपी सागरने तिला फोन केला व दहा मिनिटांत भेटायला आली नाही तर घरच्यांना मारून टाकेन,अशी धमकी दिली.घाबरलेली मुलगी क्लासमध्ये गेली असता आरोपीने त्याच्याजवळील बंदूक व चाकूच्या धाकावर तिच्यावर अत्याचार केला.त्यानंतर त्याने वारंवार तिला जिवे मारण्याची भीती दाखवत क्लासच्या फ्लॅटवर बोलविले व अत्याचार केला.२३ जुलै ते १२ ऑगस्ट २०२५ पर्यंत प्रकार सुरू होता.त्याने यादरम्यान अनेकदा तिच्या आईवडिलांना बंदुकीने ठार मारेन, अशी तिला धमकी दिली.मात्र त्याचा त्रास असह्य झाल्याने अखेर मुलीने कुटुंबीयांना आपबिती सांगितल्याने पालकांनी तिला सोनेगाव पोलिस ठाण्यात घेऊन जात तिथे तिच्या तक्रारीवरून आरोपी सागरविरोधात गुन्हा दाखल करून पोलिसांनी त्याला अटक केली आहे.