गावगाडा हाकणाऱ्या ग्रामपंचायत पदाधिकाऱ्यांना जिल्हाधिकाऱ्यांचा दणका..! – तब्बल २४ सरपंचासह ८२० ग्रामपंचायत सदस्यांचे सदस्यत्व रद्द..

बीड :-ग्रामपंचायत निवडणूक लढविणाऱ्या उमेदवारांनी ठराविक मुदतीत जातवैधता प्रमाणपत्र सादर करणे आवश्यक असतांना कालावधी लोटूनही जातवैधता प्रमाणपत्र सादर न करणाऱ्या तब्बल २४ सरपंचासह ८२० ग्रामपंचायत सदस्यांचे सदस्यत्व बीड जिल्ह्याचे जिल्हाधिकारी अविनाश पाठक यांनी रद्द करून गावगाडा हाकणाऱ्या पदाधिकाऱ्यांना जोरदार दणक्यासह झटका दिला असल्याने एकच खळबळ उडाली आहे.

जातवैधता प्रमाणपत्र विहित मुदतीत सादर करण्यास वारंवार नोटिसा बजावूनही ग्रामपंचायतीचे पदाधिकारी ऐकण्याच्या मनःस्थितीत नसल्याने सदरची कारवाई करण्यात आली आहे.जिल्हाधिकारी अविनाश पाठक यांनी गत २० जानेवारी रोजी जिल्ह्यातील आष्टी, अंबाजोगाई,वडवणी,पाटोदा, माजलगाव,केज व धारूर या ७ तालुक्यातील १३ सरपंच व ४१८ सदस्यांचे सदस्यत्व रद्द केले होते. त्यानंतर आता पुन्हा धडक कारवाई करीत ४ तालुक्यांतील ११ सरपंच व ४०२ सदस्यांचे सदस्यत्व रद्द केले आहे.त्यामुळे सदस्यत्व निलंबित करण्यात आलेल्या सरपंचांचा आकडा २४ वर,तर सदस्यांचा आकडा ८२० वर पोहोचला आहे.