खेडेगावच्या जंगलात जुगाराचा डाव; अड्ड्यावर पोलीसांची धाड.. – तब्बल २२ आरोपींना अटक करून ७१ लाखाचा मुद्देमाल जप्त..

कुरखेडा(गडचिरोली):-कुरखेडा तालुक्यातील

खेडेगावच्या जंगलात सुरू असलेल्या मोठ्या जुगार अड्ड्यावर मध्यरात्री ते आज मंगळवारी पहाटेच्या दरम्यान स्थानिक गुन्हे शाखा गडचिरोली व पोलीस स्टेशन कुरखेडा यांच्या संयुक्त पथकाद्वारे टाकण्यात आलेल्या धाडीत जुगार खेळणाऱ्या तब्बल २२ आरोपींना अटक करून ७१ लाखाचा मुद्देमाल जप्त करण्यात आला आहे.

कुरखेडा पोलीस स्टेशन अंतर्गत येणाऱ्या खेडेगाव येथील निर्जन जंगलात रात्रीच्या सुमारास अड्डा भरवत मोठ्या प्रमाणात जुगार खेळविण्यात येत असल्याच्या गोपनीय माहिती वरून स्थानिक गुन्हे शाखा व पोलीस स्टेशन कुरखेडा येथील संयुक्त पथकाने योजनाबद्धरीत्या मध्यरात्री एक वाजताच्या सुमारास धाड टाकली.यावेळी घटनास्थळी ५२ ताश पत्त्याच्या  साहाय्याने पैशाची शर्यत लावत अवैधपणे जुगार खेळवितांना मुख्य आरोपी एजाज शेख(कात्या)सह २२ आरोपी आढळून आले. प्रकरणी त्यांच्या विरोधात जुगार प्रतिबंधक कायद्यान्वये गून्हा दाखल करून  अटक करण्यात आली आहे.तसेच घटणास्थळावरून २ लाख ७५ हजार २०० रूपये रोख, जुगार खेळण्याचे पत्ते,२३ जूने वापरते मोबाइल,१३ चारचाकी वाहने,६ दुचाकी असा ७१ लाख ८५ हजार ३३० रूपयांचा मुद्देमाल जप्त करण्यात आला आहे.

सदरची कारवाई पोलीस अधीक्षक निलोत्पल,अप्पर पोलीस अधीक्षक एम.रमेश यांच्या मार्गदर्शनात कुरखेडा उपविभागीय पोलिस अधिकारी रविंद्र भोसले,स्थानिक गुन्हे शाखेचे पोलिस निरीक्षक अरूण फेगडे,कुरखेडाचे ठाणेदार महेंद्र वाघ,स्थानिक गुन्हे शाखेचे सहाय्यक पोलिस निरीक्षक भगतसिंग दूल्हत तसेच स्थानिक गुन्हे शाखा व पोलीस स्टेशन कुरखेडा येथील संयुक्त पथकाद्वारे करण्यात आली.