कुरखेडा शहर विचार मंचासह नागरिकांच्या वतीने नागपूर बस चालक तथा वाहकाचा सत्कार..

कुरखेडा(गडचिरोली):-बऱ्याच कालावधीपासून बंद असलेली कुरखेडा ते नागपूर बस अखेर कुरखेडा- कोरची मार्गावरून धावू लागल्याने परिसरातील प्रवाशांचा आनंद गगनात मावेनासा झाला आहे. अश्यातच विविध उपक्रमांसाठी प्रख्यात असलेल्या कुरखेडा शहर विचार मंचासह नागरिकांच्या वतीने आज,रविवार ८ मार्च रोजी सकाळच्या सुमारास कुरखेडा बसस्थानक परिसरात बहु प्रतीक्षेतील नागपूर बसची पारंपरिक पद्धतीने पूजा करण्यात आली.यावेळी बसचालक व वाहकाचा दुपट्टा,श्रीफळ व पुष्पगुच्छ तसेच पेढा भरवत सत्कार करण्यात आला.

मागील जवळपास सहा वर्षापासून कोरची,कुरखेडा ते थेट नागपूर ही महामंडळाची बससेवा बंद करण्यात आली होती.कोरोना कालावधी लोटूनही सदरची बससेवा पूर्ववत सूरू करण्यात न आल्याने परिसरातील विशेषतः वयोवृद्ध व महिला प्रवाश्यांना नागपूरकरीता तुटक-तुटक शारिरीक त्रासदायक प्रवास करावा लागत होता.यासंदर्भात अनेकदा शहर विचार मंचाच्या वतीने स्थानिक बस स्थानक प्रमूख श्रीधर शिवणकर यांच्या मार्फत पाठपूरावा करण्यात येत होता.तसेच नुकतेच आरमोरी विधानसभा क्षेत्राचे आमदार रामदास मसराम यांनी सुद्धा जिल्हाधिकाऱ्यांच्या उपस्थीत महामंडळाच्या वरिष्ठ अधिकाऱ्यांसोबत झालेल्या ऑनलाईन बैठकीत कोरची,कुरखेडा ते नागपूर ही थेट बस सेवा व कुरखेडा येथे बस आगाराच्या बांधकामाची मागणी प्रभावीपणे मांडली होती.अखेर त्यांच्या प्रयत्नांना यश येत कोरची-नागपूर व कुरखेडा-नागपूर या दोन बस फेऱ्या सुरू करण्यात आल्याने शहर विचार मंचाने महामंडळ व आमदार मसराम यांचे आभार व्यक्त करीत आज नागपूर बस फेरीचे चालक लक्ष्मन श्रीराव व वाहक रहाटे यांचा सत्कार केला.याप्रसंगी कुरखेडा शहर विचार मंचाचे अध्यक्ष माधवदास निरंकारी,कुरखेडा काँग्रेस तालुकाध्यक्ष जिवन नाट,माजी नगराध्यक्ष रविंद्र गोटेफोडे,राष्ट्रवादी कांग्रेस तालुकाध्यक्ष राम लांजेवार, नगरसेवक ॲड.उमेश वालदे,डॉ.सतिश गोगुलवार, प्रा.कीशोर खोपे,प्रा.डॉ.दशरथ आदे,डॉ.जगदीश बोरकर,केशव गूरनूले,राजेश उईके,सी.एल.डोंगरवार, पूंडलिक देशमुख,पूष्पराज रहांगडाले,ममता गिरडकर,योगीता मडावी,राजेश जेठानी,जावेद शेख,राकेश चव्हाण,पत्रकार सिराज पठान,चेतन गहाने,नायब तहसीलदार रेखा बोके,श्यामराव सोनुले यांचेसह शहरातील नागरीक उपस्थित होते.