काळाने झडप घातली आणि एका क्षणात आनंदावर पडले विरजण.. – दोनदा कार उलटून खड्ड्यात कोसळली; आई-वडीलांचा मृत्यू..

नागपूर :-मोठी मुलगी ॲक्सिस बँकेत नोकरीला,तर मुलाचे येत्या,रविवार २७ एप्रिलला लग्न ठरलेले आणि त्यात लहान मुलीला बीएएमएसची पदवी मिळाल्याने  अख्खे कुटुंब आनंदात होते.परंतु काळाने झडप घातली आणि एका क्षणात अख्ख्या कुटुंबियांच्या आनंदावर विरजण पडले असल्याची घटना नागपूरच्या कोंढाळीनजीक सोनेगाव शिवारातील वळणावर काल, रविवारी २० एप्रिलला सायंकाळी ५ वाजता घडली.

भरत भोयर यांची लहान मुलगी ममता ही गरूकुल मोझरी येथिल वैद्यकीय महाविद्यालय शिक्षण घेत होती.काल रविवारी तिचा पदवीदान दिक्षांत सोहळा होता.त्यामुळे भंडारा जिल्ह्याच्या लाखनी येथील भोयर कुटुंबीय सोहळा आटोपून परत येत होते.परत येतांना त्यांची अनियंत्रित कार दोन वेळा पलटी होऊन खड्ड्यात कोसळली.भीषण अपघातात कारमधील आई-वडिलांचा मृत्यू झाला.तर भाऊ व बहीण गंभीर जखमी झाले.भरत सुरजलाल भोयर वय ६५ वर्षे व लक्ष्मी भरत भोयर वय ६० वर्षे अशी अपघातात मृत्यू झालेल्या आई-वडिलांची नावे आहेत.तर शैलेश भरत भोयर वय ३४ वर्षे आणि सुश्मिता भरत भोयर वय २९ वर्षे सर्वजण रा.ता.लाखनी,जि.भंडारा अशी गंभीर जखमी झालेल्या बहीण-भावाची नावे आहेत.

माहितीनुसार,भरत भोयर यांची लहान मुलगी ममता हीने बीएएमएस पूर्ण केल्यामुळे तिचा मोझरी येथे पदवीदानचा(पदवी बहाल) समारंभ होता.या समारंभासाठी भोयर कुटुंबीय आपली वॅगनार कार क्रमांक एम.एच.३१ सी.आर-०२०१ ने लाखनी येथून मोझरीला गेले होते.पदवीदान समारंभ आटोपून भोयर कुटुंबीय लाखनीकडे परत येत होते.भरत यांचा मुलगा शैलेश कार चालवित होता.सुश्मिता त्याच्या बाजूला बसली होती.तर भरत आणि लक्ष्मी हे दोघे कारमध्ये मागच्या सीटवर बसले होते.परत येतांना काल रविवारी सायंकाळी ५ वाजताच्या सुमारास कोंढाळीपासून २ किलोमीटर अंतरावरील सोनेगाव शिवारात भारत पेट्रोल पंपाजवळील वळणावर त्यांची कार अनियंत्रित झाली.अपघातात त्यांची कार दोन वेळा उलटून एका खड्यात कोसळली.यात कारची चारही चाके वर होऊन कारमध्ये भोयर कुटुंबीय अडकून पडले.घटनेची माहिती मिळताच कोंढाळीचे पोलिस उपनिरीक्षक धवल देशमुख ताफ्यासह घटनास्थळी पोहोचले.त्यांच्यासह कोंढाळीतील सामाजिक कार्यकर्ते संजय गायकवाड व स्थानिक तरुणांनी उलटलेली कार सरळ करून कारमधील जखमींना बाहेर काढले.त्यांना कोंढाळीच्या प्राथमिक आरोग्य केंद्रात दाखल करण्यात आले.तेथे प्रथमोपचार केल्यानंतर कोंढाळी प्राथमिक आरोग्य केंद्राच्या डॉ.पूजा गायकवाड यांनी जखमींना नागपूरच्या शासकीय वैद्यकीय महाविद्यालयात पाठविले.परंतु रस्त्यातच भरत आणि लक्ष्मी भोयर यांचा मृत्यू झाला.तर त्यांचा मुलगा शैलेश व मुलगी सुश्मिता गंभीर जखमी झाले आहेत.मुलीच्या पदवीदान समारंभाहून आनंदाने परत येताना भोयर कुटुंबावर काळाने घाला घातल्यामुळे लाखनी येथे हळहळ व्यक्त करण्यात येत आहे.भरत भोयर यांची गंभीर जखमी असलेली मोठी मुलगी सुश्मिता ही ॲक्सिस बँकेत नोकरीला आहे.तर मुलगा शैलेश याचे लग्न रविवारी २७ एप्रिलला ठरले आहे.ऐन आनंदाच्या क्षणीच काळाने झडप घातल्याने देवा इतका निष्ठुर कां?…