काय सांगता..? एकाच गावातील चौघे रेती तस्करी प्रकरणात तडीपार..!

भंडारा :-जिल्ह्यात रेती तस्करीने उच्छाद मांडलेला असतांना एक उपविभागीय अधिकारी व तहसीलदार यांना निलंबित करण्यात आले होते.अश्यातच आता

अवैध रेतीच्या व्यवसायातून संघटित गुन्हेगारी करू पाहणाऱ्या आणि परिसरात दहशत पसरविणाऱ्या एकाच गावातील चार रेती तस्करांना पोलिसांनी जिल्ह्यातून तडीपार केले आहे.एकाच गावातील चौघांवर रेती तस्करी प्रकरणात तडीपार करण्याची ही पहिलीच वेळ असल्याचे बोलले जात आहे.यामुळे रेती तस्करांचे धाबे दणाणले आहेत.

भंडारा जिल्ह्याच्या मोहाडी तालुक्यातील चारगाव येथील पोलिसांच्या नोंदीवर असलेले रेतीची तस्करी करणारे गजानन ताराचंद मेश्राम,रवींद्र गुलाब ढबाले,नानाजी लक्ष्मण माहुले आणि शोभराम नानाजी माहुले या चौघांचा समावेश आहे.हे चौघेही चारगाव (ता.मोहाडी) येथील रहिवासी आहेत.मोहाडीच्या पोलीस स्टेशन प्रभारींनी जिल्हा पोलिस अधीक्षक नूरूल हसन यांच्या मार्गदर्शनाखाली या चारही जणांविरुद्ध असलेल्या गुन्हेगारी रेकॉर्डनुसार त्यांना हद्दपार करण्याचा प्रस्ताव तयार केला.तो तुमसर उपविभागीय दंडाधिकाऱ्यांनी कायद्याच्या चौकटीत बसवून जिल्ह्यातून हद्दपार करण्याचे आदेश दिले. जिल्हा पोलिस अधीक्षक नूरूल हसन,अप्पर पोलिस अधीक्षक नीलेश मोरे यांच्या मार्गदर्शनाखाली स्थानिक गुन्हे शाखेचे पोलिस निरीक्षक नितीन चिंचोळकर आणि संबंधित ठाणेदारांनी सदरची कारवाई केली.