कमला हॅरिस यांचा पराभव करीत पुन्हा एकदा डोनाल्ड ट्रम्प अमेरिकेचे ४७ वे राष्ट्रपती…

उद्रेक न्युज वृत्त :-रिपब्लिकन पक्षाचे डोनाल्ड ट्रम्प हे अमेरिकेचे ४७ वे अध्यक्ष बनले आहेत.त्यांनी कमला हॅरिस यांचा पराभव करीत पुन्हा एकदा अमेरिकेचे अध्यक्षपद मिळवले आहे.डोनाल्ड ट्रम्प यांनी २७० चा बहुमताचा आकडा पार करीत विजय मिळवला.

फॉक्स न्यूजनुसार,डोनाल्ड ट्रम्प यांना २७७ इलेक्टोरल मते मिळाली आहेत.त्याचवेळी कमला हॅरिस यांना केवळ २२६ इलेक्टोरल मते मिळाली आहेत. अमेरिकेच्या राष्ट्राध्यक्षपदाच्या निवडणुकीतील विजयानंतर डोनाल्ड ट्रम्प पत्नी मेलानिया ट्रम्प यांच्यासह त्यांच्या समर्थकांना संबोधित करायला पोहोचले.यावेळी ट्रम्प यांनी विजयाचा आनंद असल्याचे सांगितले,तसेच त्यांनी सर्व मतदारांचे आभार मानले आहेत.हा इतिहासातील सर्वात मोठा राजकीय क्षण असल्याचे ट्रम्प म्हणाले.

डोनाल्ड ट्रम्प आपल्या मतदारांना संबोधित करीत म्हणाले की, ‘आम्ही मतदारांसाठी सर्व काही ठीक करणार आहोत.आपल्या देशाने याआधी कधीही न पाहिलेला हा ऐतिहासिक राजकीय विजय आहे. ४७ वे राष्ट्रपती म्हणून मी तुमच्यासाठी रोज लढेन.हा अमेरिकेचा मोठा विजय आहे,ज्यामुळे अमेरिका पुन्हा महान होईल.आपण जेशाच्या सीमा अधिक मजबूत करु आणि देशातील सर्व प्रश्न सोडवू’.

अमेरिकेच्या अध्यक्षाची निवडणूक ही एक अप्रत्यक्ष प्रक्रिया असते,ज्यामध्ये सर्व राज्यांतील नागरिक इलेक्टोरल कॉलेजच्या ठराविक सदस्यांना मतदान करतात.या सदस्यांना इलेक्टर्स म्हणतात.हे इलेक्टर्स नंतर प्रत्यक्ष मते देतात ज्याला इलेक्टोरल मते म्हटले जाते.त्यांची मते अमेरिकेच्या राष्ट्राध्यक्ष आणि उपाध्यक्षांची निवड करतात.इलेक्टोरल मतांमध्ये बहुमत मिळविणारे उमेदवार अमेरिकेचे अध्यक्ष आणि उपाध्यक्ष म्हणून निवडले जातात.