आरोपींनी ‘त्याला’ घेरले अन् दगडाने डोके ठेचून मारले..

नागपूर :-जुगार अड्ड्याचा वाद विकोपाला गेल्यानंतर नंदनवन येथील पडोळेनगर चौकात विरोधी गटातील आरोपींनी एका गुंडाची दगडाने डोके ठेचून हत्या केल्याची घटना काल,रविवारी दुपारी तीनच्या सुमारास घडली.त्यामुळे परिसरात दहशत पसरली होती.विकेश सुखदेव जाधव वय ३२ वर्षे असे मृताचे नाव असून,तो शास्त्रीनगर येथील रहिवासी होता. डंभा,प्रभाकर व त्यांच्या साथीदारांनी विकेशची हत्या केल्याचे प्राथमिक चौकशीतून पुढे आले आहे. विकेशविरुद्ध हत्या,मकोका असे विविध गंभीर गुन्हे दाखल होते.आरोपीही कुख्यात गुन्हेगार असून, त्यांच्या विरुद्धदेखील हत्या व इतर गंभीर गुन्हे दाखल आहेत.डंभाला हद्दपारही केले गेले होते.तो जुगार अड्डा चालवीत होता.त्यावरून त्याचा विकेशसोबत वाद सुरू होता.काही दिवसांपूर्वी विकेशने डंभावर प्राणघातक हल्ला केला होता.त्यामुळे डंभाने विकेशचा काटा काढण्याचा निश्चय केला होता.

विकेश पडोळेनगर चौकात असताना आरोपींनी त्याला घेरले व त्याची दगडाने डोके ठेचून हत्या केली. त्यानंतर आरोपी फरार झाले.नंदनवनचे वरिष्ठ पोलिस निरीक्षक पोपट धायतोंडे हे आरोपींचा शोध घेत आहेत.