आजपासून १२ वी परीक्षेचे प्रवेशपत्र ऑनलाईन उपलब्ध..

नागपूर :-फेब्रुवारी-मार्च २०२५ ला होणाऱ्या उच्च माध्यमिक प्रमाणपत्र (इ.१२ वी) परीक्षेचे विद्यार्थ्यांचे प्रवेशपत्र आजपासून म्हणजेच १० जानेवारीपासून बोर्डाच्या संकेतस्थळावर ऑनलाइन उपलब्ध करून देण्यात आले आहेत.उच्च माध्यमिक शाळा,कनिष्ठ महाविद्यालयांनी प्रवेशपत्र डाउनलोड करून,त्यांची प्रिंट काढून कोणतेही वेगळे शुल्क न घेता विद्यार्थ्यांना द्यावे; असे आदेश मंडळाने दिले आहेत.

महाराष्ट्र राज्य माध्यमिक व उच्च माध्यमिक शिक्षण मंडळ,पुणे यांचेशी संलग्न असलेल्या सर्व उच्च माध्यमिक शाळा,कनिष्ठ महाविद्यालयांचे मुख्याध्यापक,प्राचार्य,शिक्षक,विद्यार्थी व पालक यांना सूचित करणारे १२ वी परीक्षेच्या प्रवेशपत्राबाबतचे परिपत्रक मंडळाच्या सचिवांकडून काल गुरुवारी जाहीर करण्यात आले.इयत्ता १२ वीच्या परीक्षेची प्रवेशपत्रे ऑनलाइन पद्धतीने मंडळाच्या

www.mahahsscboard.in या संकेतस्थळावर आज शुक्रवारपासून Admit Card या लिंकद्वारे डाउनलोड करता येतील,महाविद्यालयांनी ही प्रवेशपत्रे प्रिंट करून विद्यार्थ्यांना द्यावयाची आहेत.यात काही तांत्रिक अडचण उद्भवल्यास शाळा,कनिष्ठ महाविद्यालयांनी विभागीय मंडळाकडे संपर्क साधावा.

सदर प्रवेशपत्राची प्रिंट काढून त्यावर मुख्याध्यापक, प्राचार्य यांचा शिक्का उमटवून स्वाक्षरी करावी. अतिविलंबाने आवेदनपत्रे भरलेल्या व विभागीय मंडळामार्फत दिलेल्या विद्यार्थ्यांची प्रवेशपत्रे ‘एक्स्ट्रा सिट नं.ॲडमिट कार्ड’ या पर्यायाद्वारे उपलब्ध होतील. डाऊनलोड केलेल्या प्रवेशपत्रामध्ये नाव,आईचे नाव,जन्मतारीख अशा दुरुस्त्या असल्यास सदर दुरुस्त्या ऑनलाइन पद्धतीने करावयाच्या असून त्याकरिता ‘Application Correction’ ही लिंक उपलब्ध करून देण्यात आलेली आहे.विहित दुरुस्ती शुल्क भरून दुरुस्त्या विभागीय मंडळाकडे मान्यतेसाठी पाठविण्यात याव्यात.विभागीय मंडळाच्या मान्यतेनंतर ‘Correction Admit Card’ या लिंकद्वारे सुधारित प्रवेशपत्र उपलब्ध होतील.