आमदार रामदास मसराम यांची गडचिरोली जिल्हा सामान्य रुग्णालयास भेट.. – विधानसभा क्षेत्रासह जिल्ह्यातील आरोग्य सुविधांबाबत जिल्हा शल्य चिकित्सकांशी चर्चा..

गडचिरोली :-आरमोरी विधानसभा क्षेत्राचे आमदार रामदास मसराम यांनी आज,गुरुवारी ९ जानेवारीला गडचिरोली जिल्हा सामान्य रुग्णालयास भेट देऊन रुग्णांची पाहणी करीत रुग्णालयात दिल्या जाणाऱ्या सोयीसुविधांबाबत रुग्णांशी संवाद साधून आस्थेने विचारपूस करीत माहिती जाणून घेतली.त्यानंतर आरोग्याशी संबंधित इतर समस्यांवर जिल्हा शल्य चिकित्सक डॉ.माधुरी कीलनाके यांच्याशी चर्चा करून समस्यांचे निराकरण करण्यासाठी तातडीने उपाययोजना करण्यात याव्यात; अशी मागणी केली.

कोरची,कुरखेडा,आरमोरी आणि देसाईगंज या ठिकाणी रुग्णवाहिका सेवा तातडीने उपलब्ध करून द्यावी,जेणेकरून गंभीर रुग्णांना तातडीने उपचार मिळू शकणार,अपंग प्रमाणपत्रांसाठी योग्य असेसमेंट प्रक्रिया राबविण्यात यावेत,ज्यामुळे अपंग व्यक्तींना वेळेत प्रमाणपत्रे मिळतील.रक्तपेढीच्या सुविधांबाबत ब्लड स्टोरेज कुरखेडा आणि देसाईगंज येथे सुरू करण्याची गरज व्यक्त केली.तसेच जिल्ह्यातील आरोग्य केंद्र-उपकेंद्र,ग्रामीण रुग्णालय,उपजिल्हा रुग्णालयात सर्व सोयी-सुविधा तातडीने उपलब्ध करून देण्यात याव्यात; जेणेकरून रुग्णांची गैरसोय होऊ नये तसेच रेफर करण्याचे प्रमाण कमी व्हावे; असे प्रसंगी आमदार रामदास मसराम यांनी जनतेच्या आरोग्य संबंधित विविध बाबींवर जिल्हा शल्य चिकित्सक डॉ.माधुरी कीलनाके यांचेशी हितगुज साधून रुग्णांच्या हितावह चर्चा करून लवकरात लवकर प्रश्र्ने मार्गी लावण्यासाठी प्रयत्नांची पराकाष्ठा केली.