अवैध रेती भरलेल्या ट्रॅक्टरने उडवले; २८ वर्षीय तरुणाचा जागीच मृत्यू..!

भंडारा :-जिल्ह्याच्या तुमसर तालुक्यात रेती घाट बंद असतांनाही अवैध गौण खनिजांची चोरी होत असल्याचा प्रकार एका अपघाताने उघडकीस आला आहे.पहाटेच्या सुमारास कामाहून सायकलने परत जाणाऱ्या एका २८ वर्षीय तरुणास अवैध रेतीची वाहतूक करणाऱ्या टॅक्टरने धडक देत जिवानिशी ठार केल्याची घटना तुमसर तालुक्यातील तुमसर-कटंगी महामार्गावरील साखळी-मिटेवानी मार्गावर काल रविवारी सकाळच्या सुमारास घडली.यात अनिल साहरु बागडे वय २८ वर्षे,रा.साखळी, ता.तुमसर,जि.भंडारा असे जागीच ठार झालेल्या तरुणाचे नाव असून मयत अनिल मिळेल ते काम करून संसाराचा गाडा हाकत होता.त्यातच तो कुटुंबात एकुलता-एक कमावता असल्याने कुटूंबीय उघड्यावर आले आहे.

त्याच्या पश्चात वृद्ध आई-वडील,पत्नी व तीन वर्षाची मुलगी आहे.घटना घडताच नागरिकांनी घटनास्थळी धाव घेत घटनेची माहिती तुमसर पोलिसांना दिली. सकाळची घटना असल्याने ट्रॅक्टरचालक रेतीने भरलेला ट्रॅक्टर सुसाट वेगाने चालवीत पळून गेला.परिसरातील नागरिकांनी ट्रॅक्टरचा पाठलाग करण्याचा प्रयत्न केला, पण तो पळून जाण्यात यशस्वी झाला.तुमसर पोलिसांनी घटनास्थळ गाठून पंचनामा करीत पुढील तपास सुरू केला आहे.