अभय गँगचा उच्छाद; आमगाव व सावंगीच्या चोर घाटातून अवैध रेतीची तस्करी..! – अधिकारी,कर्मचारी निलंबित होऊनही धाक ना दरारा..

देसाईगंज(गडचिरोली):-नागपुरात झालेल्या हिवाळी अधिवेशनात राज्याचे महसूल मंत्री चंद्रशेखर बावनकुळे यांनी अवैध रेती प्रकरणात उपविभागीय अधिकाऱ्यांपासून ते तहसीलदार,मंडळ अधिकारी तसेच तलाठ्यांवर कारवाईचा बडगा उगारून काहींना निलंबित केले,तर काहींवर चौकशीचे आदेश देऊन गुन्हे दाखल करण्याचे फर्मान सोडले.यामुळे संपूर्ण राज्यात एकच खळबळ उडाली आणि अनेकांना धडकी भरली. अश्यातच महसूल मंत्र्यांनी केलेल्या कारवाईचा “ना धाक राहिला,ना दरारा” राहिल्याचे चित्र गडचिरोली जिल्ह्याच्या देसाईगंज तालुक्यातील आमगाव व सावंगीच्या वैनगंगा नदी पात्रातील चोर रेती घाटांमध्ये दिसून येत आहे.या ठिकाणी अभय गँगने अवैध रेती चोरीचा जो उच्छाद मांडलाय तो संपता संपेना.! अभय गँगला आमगाव आणि सावंगी वैनगंगा नदी पात्र जणूकाही रेतीचे उत्खनन व वहन करण्यासाठी खुले करून देण्यात आले की काय? असे चित्र निर्माण झाले आहे.

अवैध रेती चोरीचा खेळ दिवसा आराम करायला सांगतो,तर रात्रीच्या अंधारात खुलेआम राजरोसपणे तस्करीत सक्रिय सहभाग घ्यायला लावतो.सावंगी वैनगंगा नदी पात्रातील चोर रेतीघाट हा सहजासहजी कुणाच्याही लक्षात येत नसल्याने तस्करीत माहीर असलेले चोर पावलांनी बाहेरच्या बाहेर रेतीची विक्री करून विल्हेवाट लावतांना दिसून येतात.मात्र,रात्रीच्या वेळी शेतकऱ्यांच्या शेतातून जाणारा पांदन रस्ता गाठला, तर चोर पोलीसांचा खेळ पटकन लक्षात येऊ शकतो. आमगाव येथील अवैध रेतीचा खेळ हा “ताल से ताल मिला” असे करून चुप्पी साधली जाते.विशेष म्हणजे, अवैध रेती चोरीत माहीर असलेले कुणाचे तोंड कसे बंद करायचे आणि आपली पोळी कशी शेकून घ्यायची,अशी अनोखी कला त्यांच्यात कुटून भरलेली आहे.नाव न लिहिण्याच्या अटीवर एकाने सांगितले की,अवैध रेती चोरट्यांमुळे आज रेतीचे भाव उतरले असून सदरची रेती देसाईगंज शहरात,ग्रामीण भागात तसेच भंडारा,गोंदिया व इतर क्षेत्रात खुलेआम जात आहे.एवढा मोठा अवैध रेतीचा खेळ सुरू असतांनाही महसूल विभाग गप्प कां? असा प्रश्न निर्माण झाला आहे.